Electoral bonds case chungchanga Supreme Court in a hauh hrep hnuah State Bank of India (SBI) chuan Election Commission of India (ECI) hnenah bond data te an pekluh tawh thu affidavit a thehlut a.
SBI chuan compliance affidavit an siamah data te chu poll body ECI hnenah pen drive in an pek thu a sawi a. Data chu PDF file pahnih password-protected hmangin an thehlut tiin a sawi.
Bank chuan affidavit an siamah April 2019 atanga February 15, 2024 inkar chuhngin electoral bonds 22,217 pekchhuah a ni a ti bawk a. Heng zinga 22,030 bonds te chu political party te lak a ni a, a la bang zawng 187 chu bank chuan Prime Minister’s national relief fund ah dan angin dahluh a ni a ti bawk.
Nuaibo tak electoral bonds scheme ang chuan donor te chuan bond an lei chu an party duhsak te hnenah an donate thei a. Mahse, party te chuan bond chu pek an nih atanga ni 15 chhungin an tlan ngei ngei a ngai a, an tlan hman lo a nih chuan Prime Minister’s relief fund ah dah luh zel tur a ni.
February 15 khan Supreme Court chuan electoral bond schee chu ‘constitution kalh’ tih leh ‘khua leh tui tena right to information an neih kalh’ tiin a lo hnawl tawh a ni.
SBI te chu bond pechhuak tawh miah lo tura hrilh nghalin bond lei dan kimchang te chu Election Commission hnena pe turin a ti a, ECI chuan mipui hmuh theihin a pholang ang a ti zui bawk.
Court chuan SBI tena data an thehluh hun atan March 6 a bituk sak a, EC pawh March 13 ah mipui hriata bond details te an website a tarlang turin a ti bawk. Mahse, SBI chuan court hnenah June 30 thlenga hun pawhsei sak turin a dil ta a, chu chu duh lovin Association for Democratic Reforms te chuan court ah an khing zui ta a ni.
Thawhtan khan Supreme Court chuan ngaihtuah nghalin SBI te ngenna leh dilna chu hnawlsakin Thawhlehni ah bond details chu ECI hnenah a pe tur a ni a ti zui a. Election Commission of India pawh Zirtawp tlai lam dar 5 hmaa website a bond detail kimchanga phochhuak turin a ti zui bawk.
SBI in ECI hnenah bond detail pe tawh
