Supreme Court chuan march 29 khan Home Ministry chu tun hnaia India ram state pariata Christian community leh institutions te beihna chi hrang hranga FIR, investigation neih chin, man leh thubuai siamsak te data lakhawm vek turin karhnih chhung hun a pe.
Chief Justice of India D.Y. Chandrachud chuan apex court chuan nikum September thla tawh khan heng thubuai leh thlen chin hrang hrang te hi lakhawm vek turin a hriattir tawh tiin a sawi a. Additional Solicitor General Aishwarya Bhati, Ministry aiawha din chuan State thenkhat ten hun an mamawh rei tiin a sawi a.
Senior advocae Colin Gonsalves, petitioners Rev. Dr. Peter Machado of National Solidarity Forum, Rev. Vijayesh Lal of Evangelical Fellowship of India leh midang te awiawh ding chuan kum 2022 hnuah kristian te beihna chu a nasa zual takzet tiin an sawi a.
“Kristian ten beih an tawk a, Kristian te lakah FIR thehluh a nasa a ni” tiin Gonsalves chuan a sawi a. Puithiam te manin an awm a, Kristian te lakah FIR thehluh a nih tamna chhan chu bail mai an harsa bawk tiin a sawi bawk.
Kristian community te huatna lam media thenkhatah leh rally neihnaah te kalpui a ni a ti bawk a. Gonsalves chuan apex court chuan a hma in huatna kalpui nasat dal turin nodal police officer te ruatin hmala tura a ti thungin, “Tun thlengin FIR pahat pawh thehluh a la ni lo” tiin a sawi bawk.
Court chuan April 14 ah case ngaihtuah tura thultukna siamin he mi hma ngei hian Home Ministery chuan State tin te atangin report a nei hman tur a ni a ti a. Heng state pariat sawi te hi Bihar, Haryana, Chhattisgarh, Jharkhand, Odisha, Karnataka, Madhya Pradesh leh Uttar Pradesh te an ni.
Court chuan he verification exercise hi state tinah kalpui ngei a tulna chhan sawiin a hmaa court in thutlukna a lo siam tawh te a bik takin tehseen Poonawalla case hmaga a siam te chu State in an awm leh zawmloh enfiahna tur tiin a sawi a. Henga court in thutlukna siam tawh te hmangin state chu communal violence heng lynching te a thlenah a tisualtute laka hremna lekkawhah mawhphurtuah a siam a ni.
Bench chuan petition a puhna awm te chu finfiah ngei a duh tia sawiin tun dinhmunah chuan heng puhnaah hian court chuan thutlukna emaw ngaihdan engmah siam a la nei lo a ti bawk.
A hma in Centre chuan petition in puhna a sawi leh siam te chu preliminary affidavit a siam hmagin a hnawl a, puhna te chu dawt tia sawiin thlanbik neia document siam a ti bawk a. Chhungkua buaina leh mimal ram inchuhna te chu Kristian te beihna ang bika tarlanin a awm, tiin Ministry chuan a chhang let bawk a.
“Kristian te tihduhdahna nia he report in a tarlan tam ber te hi dik lo taka sawi lan a ni. A then te hi chu mimal inhuatna thil vang hrim hrima irhchhuak te a ni a, chung te chu Kristian te bik beihna anga chhuah a ni” tiin sorkar affidavit siam chuan a tarlang bawk.
SC in Centre kar hnih chhung hun pe
![](https://theaizawlpost.org/wp-content/uploads/tap_logo-min-large.jpg)