Chief Justice of India D.Y. Chandrachud chuan political party te chuan Right to Information (RTI) Act hnuaia accountability-ah party chhung thutlukna te a bik takin candidate thlan chungchangah te a chhan leh vang lailan vek hlauhna an neih chu ‘awm ang lo’ a ni lo, a ti.
Chief Justice chuan national leh regional political party te chu ‘public authority’ huam chhunga awm an ni tia RTI Act-in huamtir tumna ngenna a ngaihtuah mek a.
Communist Party of India (Marxist) aiawh advocate P.V. Dinesh chuan sum lam thilah chuan political party tena financial transparency an lantir ngei chu an thlawp thu a sawi a, mahse, candidate chungchangah te chuan eng vanga candidate an thlan chu thlang nge an nih tih lailansak tumna chu an thlawp thei lo tiin a sawi a.
“|an chhan an nei a ni. Candidate kan thlan dan hi chu min zawt suh u an ti a ni. Chu chu nawr luih chi pawh niin ka hre lo,” tiin Chief Justice Chandrachud chuan petitioner te aiawha ding advocate Prashant Bhushan leh Gopal Snakaranarayanan te hnenah a sawi a.
“A bul berah chuan engtiangin nge party te an kal tih an hre duh a ni,” tiin Solicitor General Tushar Mehta, sorkar aiawha ding chuan a sawi bawk a.
Mahse Sankaranarayanan chuan court hnenah a hma pawhin court chuan political party te chu an candidate te zingah criminal record neite chu mipui hriata tlangzarha pholang turin a lo ti tawh tia sawiin chung te chuan zawm a hlawh lo, a ti bawk a.
Bhushan chuan political party te chuan sorkar atangin hlawkna tam tak an nei a, bungalow pawh an luah a. Sorkar-naah thuneihna neiin whips hmangin legislators te an thunun bawk a ti a.
He petition bakah hian NGO Association for Democratic Rights te chuan Central Information Commission (CIC) chuan kum 2013 leh 2015 khan national leh regional party te chu public authority angin a lo puang tawh, an ti a ni.
Mahse party te chuan RTI an laka hman phalna chuan confidential discussion an neih ang ang te bakah sorkar laka an rilru puthmang te sorkar tihdik loh beih let an tumna lama ruahmanna an siam te a lailang vek thei, an ti bawk a.
Union government pawhin he petition hi dodal bawkin party te chu an inrelbawlna lairil ber ber RTI hmanga lailansak theih chi a ni lo, an elpui party dang ten hlawk nan an hmang thei an ti bawk a. He case hi la ngaihtuah chhunzawm tur a ni.
SC-in ngaihtuah zui mek
