Daily Newspaper

SC-in Pegasus chungchang ngaihtuah dawn

10

Supreme Court chuan karleh lamah senior journalist N. Ram leh Sashi Kumar tena judge tanglai mek kaihhruaina hnuaia Pegasus hmanga journalist, lawyers, ministers, opposition politcians, constitutional functionaries leh civil society activists te enthlak nia sawi chu chhui chiang tura an ngenna chu a ngaihtuah tur thu a sawi.

He petition hi senior advocate Kapil Sibal chuan Chief Justice of India N.V. Ramana kaihhruai Bench-ah a sawi lang a ni.

Sibal chuan petition chu fundamental rights, khua leh tuite civil liberty leh national security khawih a nih avangin ngaihtuah ran ngai tiin ngenna a siam a. He issue hian India-ah chauh ni lo khawvel huapin ngaihven a hlawh tiin a sawi bawk.

“Military-grade spyware hmanga mass surveillance kalpui hian fundamental rights nasa takin a bawhchhia a, democractic set-up pillar pawimawh independent institution-te beihna leh tihchhiat tumna ni” tiin petition chuan a tarlang.

He petition-ah hian sorkar chu Pegasus a hman leh hman loh chiang taka sawi lang tura nawrna a awm bawk a. Petition chuan tun thlengin sorkar chuan pegasus hi a hman leh hman loh a la sawi chiang duh lo, a ti bawk.

“Ministries of Home, Information Technology and Communications-te chuan midangte enthlak nan Pegasus hi an hmang em tih an sawi chiang duh lo va, hei vang hian independent investigation nei ngei a ngai a ni” tiin petition chuan a tarlang bawk.

Pegasus hmanga inenthlakna hian right to free speech leh privacy nasa takin a tibawrhbang a. Dan behchhan engmah a nei lo va. Dan anga inenthlak theihna Section 5(2) of the Telegraph Act pawh a namnul vek zawk a, civilian-te chu target ah a chhuah a ni tiin tarlan a ni bawk.

“Surveillance/interception-te hi public emergency emaw public safety atan chauha hman theih a ni a, chu mi tur pawhin behchhan tha tawk a awm a ngai a, sorkarin a duha a kalpui ngawt theih a ni lo. Pegasus spyware hmanga inenthlak hi criminal offence a ni” tiin petition chuan a tarlang bawk.

Pegasus software, Israeli cyber-arm firm NSO Group tena an siam hi ‘changkang lutuk tak mobile phone/device te a neitu hriat miah lova luh theihna a ni’ tiin ans awi bawk a.

“Surveillance hlauhawm tak niin call zawng zawng a record vek thei a, text leh whatsApp message tinte a chhiar vek thei a, password a la thei a, email a chhiar thei a, thlalak leh video tinte a la vek thei a, camera leh microphone te pawh record nan a tinung vek thei a. Phone enthlak duh call maiin call la miah lo chung pawhin he spyware hi dahluh theih a ni” tiin petition chuan a taralng bawk.

Pegasus-te chuan an thil siam chu sorkar hnenah chauh ‘crime leh terror’ chhui nan chauha an hralh thu an sawi a. Security Lab of Amnesty International tena mobile phone thahnem tak forensic analysis an neihah Pegasus chuan security a bawhchhia tiin an sawi bawk.

N. Ram leh Kumar mai bakah hian Rajya Sabha member John Brittas leh Supreme Court advocate M.L. Sharma-te chuan Pegasus chhui chiang tura an ngenna petition an thehlut bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy