SC in Ramdev ngaihdam dilna hnawl

Supreme Court chuan Patanjali co-founder Baba Ramdev leh managing director Acharya Balkrihna ten November 2023 a medical product advertisement titawh lo tura a tihna pawisa lova an tihluih avanga ngaihdam an dilna chu a pawmsak duh lo.
Supreme Court chuan February 27 khan Patanjali Ayuved leh Balkrishna te lakah contempt notice a pe a. Court a ngaihtuahnaah pawh Ramdev leh Balkrishna te chu an awm ve ve a ni.
Justices Hima Kohli leh Ahsanuddin Amanullah te chuan senior advocate Mukul Rohatgi hnenah Ramdev chuan hriatchhuah a nih hnuah ngaihdam a dil chauh a ni a ti a. Court thu a zawm duhlohna chu a duh reng vang a ni a ti bawk.
Supreme Court chuan Patanjali, Balkrishna leh Ramdev tena ngaihdam an dilnaah a lawm lo tiin a sawi a, April 16 ah contempt of court case chu ngaihtuah a ni ang a ti bawk.
Supreme Court chuan a hranin State Licensing Atuhority officers-in-charge tuna ni mek leh a thlak taka te chu eng vangin nge Drugs and Magic Remedies (Objectionable Advertisements) Act hnuaiah Patanjali lakah hremna an lekkawh loh affidavit siam turin a ti bawk a.
Hearing neihnaah Justice Amanullah chuan Baba Ramdev chuan Supreme Court thupek tum hnih a bawhchhia tia sawiin Patanjali te thupek an nih tukah Ramdev chuan press conference a ko nghal a, a hnuah contempt ngaihtuah lai mekin a ko leh zui a ti bawk a.
“Court a inlan tura koh an nih hnuah thil a chian fak hnuah an tlawm chauh a ni” tiin Justice Amanullah chuan a sawi bawk.
Bench chuan Uttarakhand State Licensing Authority te chu publication leh advertisement tihchhuah dang turin engmah an ti lo tiin a hau bawk a.
“Eng vangin nge in officer te bricks thahnem taka kan vawmloh ang? Hun khawhralin an au mai mai a ni” tiin Justice Kohli chuan a sawi bawk a.
Court chuan State Licensing Authority ten intiamkamna an neih leh court thupek zahlo tute ngaihdam dilna paper a an ziah chu a hlu tawk lo a ti bawk a. Hetiang anga chetlakna hian Supreme Court chu nuihzaburah a siam a, mipui ten judge te an nuihsawh phah thin a ti bawk a.
Supreme Court Bench chuan State Licensing Authority officer court room chhunga awmin Drugs and Magic Remedies (Objectionable Advertisements) Act chu Bombay High Court thutlukna siam avanga ‘suspend’ a nih avangin Patanjali te chu an advertisement tihah ‘an vau’ thei chauh a ti chu a hau na hle bawk a.
Uttarakhand State Licensing Authority Officer chuan FIR ka file ang a tih chu Justice Amanullah chuan tunah chuan i lo chawlhahdam thei tawh ang a, midangin FIR an file zawk ang a ti zui a. “He ram dan in kai harh tawh a ni” tiin Justice Kohli chuan Uttarakhand Licensing Authority te hnenah chuan a sawi bawk a.
“Damna damdawi tia mipui te bum an nih laiin eng vangin nge mipakhatin zahngaihna a dawn bik ang? Mitam tak lungawilo ten lehkhain an lungawilohna an hrilh asin” tiin Justice Kohli chuan Uttarakhand Licensing Authority officer chetdan chu a sawisel zui bawk.
Supreme Court Bench chuan District Ayurvedic leh Unani Officers, Haridwar a mi Uttarakhand State Licensing Authority a kum 2018 atanga 2024 inkara thawk zawng zawng te chu Supreme Court thupek zawm lova dan anga Patanjali laka eng vanga hma la lo nge an nih sawifiahna affidavit siam vek turin a ti zui bawk.