Nikum Qatar ram World Cup-a Argentina champion-puitu Lionel Scaloni chuan kum nga chhung zet a enkawl tawh team chhuahsan ve tawh turin banna a thehlut mai thei tih a sawichhuak.
Thawhlehni South American World Cup qualifying match ngaihven hlawha sikhat faia mualneitu leh an hmelma lian Brazil an hneh hnu lawk khan Rio de Janeiro khawpuia a team chakpuitu chuan thupuan bengverh zet neiin, a hna vawn lai kalsan tumna chungchang a sawi a, mak tih a hlawh nghal.
Kum 45 mi hian mi beisei a pha lo niin a inngai deuh nge Argentina chuan chakna thahrui zawng zawng kawltu coach tha a mamawh thu sawi chungin, “Ball tihdina ngaihtuahna hman tan ka ngai. Tun hunah hian thil tamtak ngaihtuah tur ka nei.
“In mangtha nghal rum rum emaw phei chu a ni lo a, mahse, kan zuankhum tur hmawlh kham hi a sang em mai a, hmalam pan zel dan tur hi a khirh a, hnehna chan zel pawh thil buaithlak a nih avangin inngaihtuah lawk ka ngai.
“Mi thenkhat hian thil an tikhrihkhan zo a, chuvangin engngemaw ka ngaihtuah lawk a ngai a, FA president ka biak zawhah player-te ka titipui zui leh ang,” a ti.
Scaloni hian Jorge Sampaoli thlakin August 2018 khan Argentina boss nihn a chelh tan a, a hmain hun rei vak lo under-20 team a lo enkawl zawk tawh bawk.
A hoa 2021 Copa America hnehna an sualchhuah kha kum 28 chhunga Argen-tina major title hmasaber niin, kha hlawhtlinna avang khan June 2022-a Europe leh South American champion-te inhmachhawnna Finalissima (grand final)-ah European champion Italy an hma-chhawn theih phah a, Wembley khel-mualah CONMEBOL champion hian 3-0 hnehna an chang zui nghe nghe.
Scaloni ho bawkin Qatar-ah World Cup trophy an chawi zui leh a, world champion tum thum an nihna leh kum 1986 hnu lama global title an hawn leh vawikhatna a ni.
Chuti khawpa Argentina vawrhsangtu coach chuan a rukin vuivaina a nei nge tunhnaiah thu thinthawng tak a chhak chhuak a, Argentina leh Tottenham defender Cristian Romero tawngchhuak zui nghal vatin, an head coach chuan a hna ngai a chelh chhunzawm zel a beisei thu leh inngaihtuah zuaina hun a neih thu a sawi a, chumi chungchang erawh Brazil an hneh tum khan dressing room lamah engmah a sawichhuak lo tih a tarlang tel.
Lionel Scaloni hian football a khelh laiin hun rei vak lo loan-in West Ham thuam a lo inbel ve zawk tawh a, De-portivo La Coruna, Lazio leh Atalanta tan a khel tawh bawk.
Thawhlehnia Argentina result kha World Cup qualifying away match bika Brazil an hneh vawikhatna niin, Rio de Janeiro khuaa an point thum thawhchhuah hmang khan South American table chungber thut chungin anmahni hnaihbertu Uruguay lakah point hnihin an sang.
Rio khawpuia Maracana stadium inkhel kha national anthem pahnih sak laia mipuiin buaina an siam avangin darkar chanve zet tihkhawtlai a ni.
Scaloni bang mai thei
