Lunglei district-ah school naupangten bag rit lutuk avanga an taksa lama harsatna an tawh loh nana hma lak dan tur ngaihtuahin Thawhtanni khan district bawrhsap R Lalthazuala kaihhruaiin thutkhawm a ni.
Bawrhsap chuan Mizoram sawrkarin 2021 April 30 khan school naupang bag rit lutuk chhawk zangkhaina tur inkaihhruaina a lo chhuah tawh tih a sawi a. Lunglei district-ah pawh a theih chin chinah bawhzui a nih rualin, tun dinhmunah engtia kalpui nge tha ang, tih ngaihtuah turin inrawnkhawm hi buatsaih a ni tih a sawi.
Thutkhawmah hian bag rit lutuk nena nitina school kal thin naupangte hriselnain a tawrh theih dan tarlan niin, zangkhai zawka kalpui a nih theih dan tur sawi a ni. He harsatna sukiang tura 2021-a School Education department-in thu a lo chhuah tawh chu District Education Officer-in government leh private school zawng zawngah Mizo tawngin thawn chhuak se, tih a ni.
School zawng zawngin an zirlaite tan tui in tur thianghlim leh hnianghnar an neih theih nan ruahmanna siam nise, an ti bawk a. SCERT-ah school exam term khata zir tur ang zela zirlaibu siam tura thlen rel a ni bawk.
Thutkhawmah a kaihhnawih sawrkar hotute bakah tlawmngai pawl, zirlai pawl leh zirtirtu pawl hrang hrang hruaitute leh private leh kohhran school aiawhte an tel a ni.
Ruahman dan chuan –
* School tinah lekhabu dahna (bookshelf) neih theih dan tur ruahman nise, tih a ni.
* School-a zir hunbi (routine) mila lehkhabu thlak loa lekhabu zawng zawng ken vek chuan bag a tihrih zual avangin, routine anga lehkhabu ken turte chu nu leh paten enpui bakah zirtirtuten an subject mamawh chauh keng tura hrilh nise, tih a ni.
* Sawrkar inkaihhruaina angin ni khatah class I & II tan subject 3, class III – V tan subject 4, class VI – X tan subject 6 angin kalpui nise; homework pek danah nitin primary school-ah subject 1, middle school-ah subject 2 leh high school & higher secondary school-ah subject 3 aia tam pek loh ni se, tih a ni.