School band an intihsiak
State Level School Band Competition chu 1st Battalion MAP Ground Armed Vengah Thawhlehni khan neih a ni a. Pipe Band Girls-ah Govt Saitual High School Girls Band pakhatna niin, mipa-ah Govt Southern High School Hnahthial Boys Band pakhatna an ni. Intihsiak hi mipa leh hmeichhia a hrang ve vea neih a ni.
Mizoram Samagra Shiksha buatsaih State Level School Band Competition-ah hian Mizoram district hrang hrang atangin Pipe Band 12 an tel a, kumin hi Aizawl district ni lo district dang an tel tumkhatna a ni. Aizawl district atanga tel thin Govt Mizo High School chu kum hmasa lamah national level-a lawmman an lak avangin tun tumah hian an tel thei rih lo a ni. Govt Saitual High School Girls Band leh Govt. Southern High School Hnahthial Boys Band hi Eastern Zone competition-ah Mizoram aiawhin an tel dawn.
School band intihsiak hi sawrkar laipui Ministry of Education leh Ministry of Defence thawkdunin kumtina an buatsaih thin a ni a; state level leh zonal level chu Samagra Shiksha-in a buatsaih thin. National level hi NCERT-in a buaipui thung.
Band intihsiak hi chhawng thuma neih thin a ni a. State level school band intihsiaka pakhatna theuh chu zonal level intihsiakah an inel a, zonal level-a tithate hi national level-ah an intihsiak leh thin a ni.
Zonal level-ah hian India ram state leh UT hi zone li – Eastern, Western, Southern leh Northern zone a then a ni a. Mizoram hi Eastern zone-ah awmin, he zone-ah hian Jharkhand, West Bengal, Odisha, Arunachal Pradesh, Assam, Meghalaya, Manipur, Mizoram, Nagaland, Tripura leh Sikkim an awm. Zonal level intihsiaka tithate hi New Delhi-a national level intihsiakah an inlan a ni.
School band an intihsiak
