School textbook siamremtu
turte tan workshop buatsaih
Directorate of SCERT Mizoram buatsaihin ni li awh tur ‘Workshop to Contextualise & Revise Elementary School Textbook for the Academic Session of 2026-2027’ chu Thawhlehni khan tan a ni.
SCERT director Caroline Zoramthangi chuan NEP 2020 hrin chhuah chu National Curriculum Framework 2023 a ni a; NCF 2023 hian curriculum leh syllabus thar a hring ve leh a, Mizoram-in curriculum leh syllabus milin 2026- 2027 academic session atanga hman tur texbooks thar an buatsaih a ngai ta tih a sawi.
“Kan textbook thar buatsaih tura min kaihruaitu tur chu curricular goals, competencies leh learning outcomes a la ni reng dawn a. NCERT textbook kan hman avangin paih ngai kan tih leh belh ngai kan tih en chung zelin, kan state mil, kan culture mil texbook tha tak kan siam chhuah ngei ka beisei,” a ti.
SCERT Mizoram hian NCERT textbook thar hi Mizoram mila siam rem (contextualisation and adaptation) phalna a nei tih Caroline Zoramthangi chuan a sawi a. Tun tumah hian pawl 1, pawl 2, pawl 3 leh pawl 6 zirlaibu siamrem niin, kum 2026- 2027 atanga hman tan tur a ni. Mizo leh Hindi subject bik erawh textbook hman lai ennawnin, NEP 2020 leh NCF-SE 2023 zulzuia dah belh ngai leh siamrem ngai siamrem tura buatsaih a ni tih a sawi.
Workshop-ah hian subject hrang hrang – English, Hindi, Mizo, Social Science, Environmental Studies, Mathematics leh Science Textbook Committee an tel a. Subject Committee member atan hian school, college, university leh School Education department-a thawkte ruat an ni.
School textbook siamremtu turte tan workshop buatsaih
