Site icon The Aizawl Post

Scotland-in hnimhlum hmang tawh dawn lo

Scotland chu khawvel ram zingah, hospital-a hnimhlum (anaesthetic) chikhat desflurane hman khap hmasa ber a ni a; environment a tihchhiat nasat vang nia sawi a ni.
National Health Service data chuan anaesthetic gas hi mi zai laia zaia te nikhua hre lova siamtu niin, mahse environment tana pawi em em a ni thung a; carbon dioxide aiin a let 2,500-in global warming thlen lamah a hlauhawm zawk a ni, a ti.
Scotland rama hman khap a nih hnu hian kum khata emission an tihhniam phahna tur chu chenna in 1,700 vel lai tih en theihna khawp a tling dawn a ni.
UK hospital-te pawhin anaesthetic hman hi nasa takin an lo tihniam tawh bawk a. Tun hnaiah England leh Wales-a hospital trusts 40 lai te chuan anaesthetic hman an lo khap tawh bawk a.
NHS England pawhin kum 2024 atangin hman a khap dawn a, Scotland chuan he hnimhlum hi loh theih loh thil tak takah lo chuan hman a khap a ni.
England-a NHS hospital tina hman khap ni se emission hlauhawm a pekchhuah tihtlem hian chenna in 11,000 tena emission an pekchhuah hu a tling pha dawn niin NHS te chuan an sawi.
European ram dangte pawhin hun rei lo te chhungin hnimhlum hman hi an khap zui tura ngaih a ni.
Dr Kenneth Barker, anaesthetist and clinical lead for Scotland’s national green theatres programme chuan anaesthetic drugs kum tam tak a hman chu environment tana pawi leh hlauhawm em em a ni tih a hrechhuak chuan mak a tihtir thu a sawi a.
“Kum 2017 daih tawh khan ni tin kan hnathawha desflurane kan hmana emission a pekchhuah chu ni khata 670 miles vehicle khalha emission pekchhuah zat nen a inhen reng tih ka hre chhuak a ni,” tiin a sawi a.
“Kha vang khan ka hmang lo nghal hmak a, ka anaesthetists pui te pawhin an hmang lo zui nghal a ni. Environment a khawih chhiatzia kan hriatfiah hnuah vawiin dinhmun kan thleng thei hi lawmawm ka ti,” tiin a sawi.
Damdawi in tam ber te chuan environment tana pawi lo zawk anaesthetic gases chikhat sevoflurane te an hmang ta zawk a, chu pawh chu carbon dioxide aia a let 130 laia global warming thlen kawnga la thawk na zawk a la ni fan a, hei bakah hian alternative non-gases anaesthetics leh khawl thil tha zawk te hman an uar ta bawk.
Dr Helgi Johannsson, vice president of the Royal College of Anaesthetists chuan, “UK a anaesthetists te chuan he gas-in environment a tihchhiat theihzia hriain a hmang duh lo an pung zel hi ka chhuang a ni,” tiin a sawi bawk.

Exit mobile version