Daily Newspaper

Season kharnaa tlan tur Hamilton

10

Naktuk, Pathianni hian Abu Dhabi Grand Prix hmangin Formula One season hmawr an bawk dawn a, Covid-19 kai vanga inkhungbo Lewis Hamil-ton chu United Arab Emirates khaw-puiah hian a inlan thei dawn em a chiang lawk lo a, mahse, test a hmachhawn hnuhnungberah Briton hi a negative tak avangin kumin race hnuhnungberah a inlan thei dawn.

Tun season-a world championship title la fel tawh Hamilton hian Formula One great Michael Schumacher-a record nihrualin F1 title pasarih a la tling a, German legend Schumi ai hian race hnehna chan tam lamah te, podium lawn gun leh pole position chan tam lamah a chungnung a, hei vang hian F1 driver piangchhuak tawh zawng zawng zinga hlawhtlingber a ni.

Tun intlansiak hnuhnung pahnih kha Bahrain-ah nghah niin a hmasa zawkah hnehna changin, a hnu lawk test-ah coronavirus a kai tih hmuhchhuah a ni a, karliamtaa Sakhir Grand Prix-ah a inlan thei ta lo a, Bahrain-ah ni 10 a inkhung a, endik a nih leh hnuah a lo negative tak avangin tunkar Ningani khan Abu Dhabi a thlawklut a, season hmawrbawknaah intlansiak a hmachhawn thei dawn tih club lam pawhin an nemnghet zui ta a ni.

Kum 35 mi Hamilton a inpeihchhuah leh hman tak si avangin Sakhir Grand Prix-a a hmunruak luaha tha zeta a Mercedes debut hmangliam British driver ve bawk George Russell chuan season hmawrbawkna a hmachhawn thei dawn ta lo a, Hamilton hi la dam lo chu ni se kum 22 mi Russel bawk hi Mercedes tana Abu Dhabi tlankawnga car khalh leh tur a ni a, tunah chuan Williams lama a kirleh a ngai ta a ni.

Formula 1 thuneitu FIA chuan Hamilton-a dam thu leh season final race hmachawn tura a thlawhchhuah theih thu hi an tarlang a; Mercedes lam chuan Inrinni final practice session tan hma ngeiin Hamilton-a’n car a khalh dawn leh dawn loh chungchangah thutlukna an siam dawn tih an puang ve thung.

Hamilton hian Thawhlehni daih tawh khan social media lamah video message tichhuakin, a dinhmun that thu leh a positive test hnua taksa sawizawina (physical training session) hmasaber pawh tha taka a zawhfel theih thu a sawi a, car chhunga a kirleh theih thuai a beisei thu a tarlang tel.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy