Mizoram Synod bultumin Synod Executive Committee (SEC) member-te leh 9th Mizoram Legislative Assembly member-te chu Nilaini khan an inkawm a. Sawrkarin bawhzui tura an duh te an lo thlen nghal a ni.
Chief minister Lalduhoma chuan an sawrkarin kohhran leh tlawmngai pawlte nen thawhhona tha tak neih an duh angin an nei ni pawhin an hria a, an lawm hle tih a sawi. Duhsak bik nei loa kala mipui sawrkar neih an tum a; eirukna leh hlemhletna titlem turin Project Monitoring Committee chak takin an kal mek tih a sawi. Endik tur a tam avangin hun reilote chhungin kan endik vek seng dawn loa, kohhran pawhin tul in tih rawn thlen thin ula a tha hle,” a ti.
Zirna lamah sawrkarin kohhran nena innghenga kal a duh a, PPP mode-a kal dan tur an dap mek tih a sawi. Ram leilung semrual thu ah progressive tax system hmanga ven theih a nih an beisei a, ram pum hi LSC hmanga cover vek tha an ti a, chumi atana thawktu indaih lohna chu ‘outsource’ an tum dawn tih a sawi a ni.
Zu leh ruihhlo chungchang chu kohhran hrang hrang thalaite nen an sawiho tawh a, sawrkar din Core Committee kaltlangin cheng vaibelchhe 3 hmanga chet lak tan an tum a, hnathawh tichak turin dan siamrem an tum tih chief minister hian a sawi bawk.
“Kohhran nen project intawm kan ngah em em a; kan ram tan, kan hnam tan leh Chanchintha tan thawkho ang u,” a ti.
Assembly speaker Lalbiakzama pawhin Mizoram Synod-in inkawm a buatsaih chu lawmawm a tih thu a sawi a. “Sawrkar leh ram hmangaihtu kohhran kan nei hi kan vannei a. Thurawn kan mamawh a, zilh kan ngaihna a awm a,
Mizoram Synod-in sawrkara a thu thlente –
8 Hleih nei loa rorel tur leh corruption tibo turin
8 Dan hmanga rorelna kengkawh turin
8 Zirna siamtha tura thawhho a, Chanchintha leh kan sakhua venhim
8 Ram hmasawnna atan tan la tur leh ram leilung insemrual lama tan la turin
8 Zu leh ruihhlo tihrem tuma tan la turin
8 Sumdawnna tha lo tihbo theih nan hma la turin
8 Fa nei tam uar zawnga hma la tur leh hriselna kawnga tan la turin
8 Thing leh mau leh nungchate humhalh
8 Mizo tawng humhalh tura tan laka 8th Schedule-a telhtir
8 Ramri chin siamfela humhalh leh state dang nena inkalpawhna tha neih
8 Thutiama rinawm tur leh tihhlawhtlin theih loh tur thila mipui hmaa intiam lo turin
inzir zel mamawh kan ni. A tulna apiangah inpui tawn ang u,” a ti.
Synod aiawhin secretary Rev PB Mankima chuan thu a sawi a. Ram rorelna chu Pathian rawngbawlna pawimawh a nih avangin thawhpui an inpeih reng a. An tan an tawngtai thin, tiin a sawi. “Taksa lama mipui mamawh thlentu in ni a, keini hi thlarau lama an mamawh enkawlin kan awm a, taksa leh thlarau chu sawi hran theih ni mah se, thenhran hleihtheih loh a ni a, kan thawhho that a tul niin kan hria,” a ti. Mizoram Synod-in sawrkara a thu thlente a chhiarchhuak a ni.
MLA dang – Lalchhandama Ralte, C Ngunlianchunga leh B Lalchhanzova leh pawhin thu an sawi a ni.
Inkawmhona hi Synod moderator Rev R Vanlalnghaka’n a kaihruai a; Synod senior executive secretary Rev C Zorammawia’n inhmelhriattirna leh inlawmna sawiin, Mizoram Synod chuan MLA inthlanpui neih a, sawrkar thar a pianin MLA leh SEC inkawmho a buatsaih thin tih a sawi. SEC hian MLA zawng zawng hi Holy Bible an pe a ni.
MLA zingah state pawn lama zin mek, damsam lo, programme lo nei lawk tawh leh an biala chhiatna thlen vanga awmchilh mek vanga tel thei lo an awm a ni.