Selena Gomez, kum 31, chuan a album tlangzarh leh tur a album tawpna tur a nih a rinawm tawh niin a sawi a, rimawi chawlhsan a, lemchan lama insawrbing tawh law law a tum dawn niin a lang.
Selena hian Smartless podcast-ah, “Rimawi kha ka tuipui a, tour te pawh nuam ka ti. Mahse, kan TV show (Wizards of Waverly Place) kan tihlai kha a ni bawk a, nuam ka ti a, ka chhunzawm ta zel a ni. Mahse, kum te a lo tam ve telh telh a, eng emaw han insawrbingna tur kan dap tan ta a. Album pakhat te chu la puitlin leh thei turah ka inngai a, a bak chu lemchan lam ka thlang tawh ang. Kan rimtawng ve tawh a, han awm awl ve deuh te kan thlahlel ta,” a ti.
Selena hian 2021 khan a album ‘Revelacion’ a tlangzarh a, hei hi a album hnuhnung ber a la ni rih a, 2020 khan ‘Rare’ tlangzarhin, 2015-ah ‘Revival’ leh 2013-ah ‘Stars Dance’ a lo tlangzarh tawh bawk.
Selena hi a lar chhuahna chu TV a ni a, 2002 khan Barney-ah naupang tein a inlan a, chumi hnuah ‘Wizards of Waverly Palce’-ah chang lehin hei hi a lar chhuahna a ni ta a, tunhnaiah ‘Only Murders in the Building’-a a channa avangin Emmy nomination pahnih a nei ta bawk a ni.
Selena Gomez-i’n rimawi a chawlhsan hnai
