USA a khelh mek Fifa Club World Cup quarter-final chu pathianni zing khan khelh zawh a ni ta a, European club lian Real Madrid leh Paris St-Germain ten hnehna changin semi-final an lut. Real leh PSG te hi final luh inchuhin an inhmachhawn zui dawn. An rual hian Chelsea leh Flumines ten semi-final an lut ve bawk.
PSG 2-0 Bayern
UEFA Champions League champion Paris St Germain hian quarter-final-ah khingpui hautak tak an nei a, German champion Bayern Munich an hmachhawn. Mercedes-Benz Stadium-a inkhel hmuhnawm takah pahniha tlem zawk ni chungin hnehna an chang a, semi-final an lut.
European club lian pahnih; PSG leh Bayern Munich te hi an inhnehtawk viau a, goal pawh a lut har hle. Hun rei tak chhung goal lut a awm theih loh hnuin PSG in goal thun theihna hun tha zet mai a nei a, Dembele chuan goal ruakah uiawm zetin a pet lut lo. Dembele-a’n a hun tha neih a hlah hnuin 2024-25 season-a vul tak Désiré Doué chuan minute 78-naah PSG hmahruaina goal a thun ta nawlh.
Hma hruaina goal an thun vangin PSG an phur viau a, an phur rei lo viau thung. Minute 82-naah Willian Pacho hnawhchhuah a ni. Bayern in goal thun tuma an nawr nat em em laia kim lo zawk an nih vangin PSG an thlamuang lo viau a, thinphu dep depin an awm. Tlem zawk an nih tawh laiin Lucas Hernández chu minute 90’+2-ah hnawhchhuah a ni zui leh a, pahnih ngawta tlem zawk an nih vangin an dinhmun a derthawng tak zet tawh. Pahnih ngawt tlem zawk ni bawk mah se PSG an hnual mai lova, an buai hek lo. Ousmane Dembélé chuan minute 90’+6-naah an goal hnihna thunin an chakna a nem nghet a. Inkhel hmuhnawm takah 2-0 a hnehna changin semi-final an inhlangkai zui ta a ni.
Bayern hi PSG lakah a vanduai hle, chawlhlawk hmain an player pawimawh Jamal Musiala chuan hliam na tak a tuar a, a hliam vangin Musiala hi a chawlh rei viau a rinawm. Musiala a inhliam bakah hian VAR rawn a nih hnuin an goal thun leh penalty an hmuhte hnawl a ni zui bawk. An vanduai a kaltluan em vangin PSG lakah an tlawm a, semi-final an lut zo ta lo a ni.
Real 3-2 Dortmund
Pathianni zing lama inkhel hmuhnawm takah Real Madrid chuan Borussia Dortmund lakah 3-2 in hnehna an chang a, PSG hmachhawn zui leh turin semi-final an lut.
Real Madrid hian German club lian Borussia Dortmund lakah bul an tan tha a, minute 20 chhung lekin goal hnih an thun hmang. Los Blancos tan hian inkhel tan atanga minute 10-na lekah Gonzalo García chuan hmahruaina goal a thun nghal. Hma taka goal an thun vangin an phur a, inrintawkna sang tak nen an inlan zui theih phah bawk. Goal hmahruai an thun atanga minute 10-na chiahah Fran García chuan an goal hnihna a thun zui leh zat a, si hnih faia hmahruai chungin chawlhlawk an hmang.
Minute 20 chhunga goal hnih an thun hmangin Real Madrid hian si hnih faiin hma hun pangngai tawp thlengin hma an hruai. Hun pangngai tawp hnu, hun pek belh tlemteah goal thum ngawt a luh bakah red card hmu an awm bawk a, hmuhnawm zetin khel an khar. An si phurh sut tuma tan khawh Borussia Dortmund tan Maximilian Beier chuan minute 90’+2-naah goal thunin an si phurh a sut then. An si phurh an sut then vangin phur viau mah se an phur rei lo. Minute 90+4-ah Real Madrid tan Kylian Mbappe chuan Real Madrid goal thumna a thun zui leh zat a, an hmahruaina a tizau nawn leh.
Mbappe goal thun vangin hnual viau mah se minute 90+6-a Dean Huijsen hnawhchhuah a ni leh penalty an hlawhchhuah vangin Dortmund an phur thar leh. Penalty an hmuh hi Serhou Guirassy chuan minute 90’+8-naah a pet goal a, Real Madrid nen an inkar a tizim. An inkar zim hman viau mah se Dortmund in goal dang an thun belh thei tawh lova, Real Madrid lakah uiawm taka tlawmin, semi-final an lut zo ta lo a ni.
Semi-final-ah PSG leh Real Madrid te an inhmachhawn zui leh dawn a, inkhel hmuhnawm tak a nih ngei a rinawm.
Chelsea leh Flumines an tlang
Zirtawp zana quarter-final khelhah English club lian Chelsea leh Brazil club lian Flumines ten semi-final-a intum leh turin hnehna an chang.
Chelsea tan hian Cole Palmer chuan minute 16-na lekah Palmeiras laka hma an hruaina goal a thun a. Chelsea player thar tur Estêvão chuan minute 53-naah goal thunin an si phurh a sut. Hun rei tak goal a luh belh theih loh hnuin hun tawp dawn hnaiah Palmeiras an vanduai a, Agustín Giay chuan minute 83-naah an lamah a ti-goal. Agustín Giay own-goal hmangin Chelsea hian hnehna an chang, Brazil club bawk hmachhawn leh turin semi-final an lut.
Zirtawp zana inkhel dangah Brazil club Flumines chuan Manchester City hnawtchhuaktu Al-Hihal chu Martinelli leh Hérculesn te goal thun hmangin an hneh a, semi-final an inhlangkai.
Semi-final-ah Chelsea in Flumines an hneh a nih chuan final-ah European club an intum ang a. Flumines in Chelsea an hneh hlauh a nih erawh chuan South American khawmual club lian leh European club lian ten khawvela club thiam ber nih an inchuh a ngai dawn thung.
