Senegal an champion

Pathianni zan khan Africa Cup of Nations (AFCON) 2025 final khelh a ni a. Inkhel hmuhnawm leh chhangte ang reng takah Senegal chuan inelna thlengtu Morocco chu 1-0 in an hneh a, a vawi hnih nan an champion. AFCON 2025-ah hian Senegal champion puitu Sadio Mane chu player tha berah thlan a ni.
Final hi Morocco khawpui Rabat-a khelmual ngaihhluthlawh tak Stade Prince Moulay Abdallah-ah khelh a ni. Inelna thlengtu Morocco hi champion tura rinkai zawk an ni. An khelmualah ngei kum 50 hnuah champion ngei tumin tan an khawh a, champion theihna hun tha pawh an nei. Hun tawp dawn tepa penalty an hmuh an chhawr tangkai loh vangin an tualzawlah ngei uiawm takin an champion zo ta lova, mittui nen inelna lian an thlahliam.
Final hmuhnawm takah Morocco leh Senegal an inhnehtawk viau a, minute 90 chhungin goal thun thei an awm lo. Hun pangngai tawp hnu, hun pek belhah Senegal in goal an thun a, an goal thun pawmsak an ni lo va, Morocco an him hlauh thung. Sengal goal thun hnawl a ni a, hun pek belh tawp dawn tepah inhnial theih takin penalty an chawi zui bawk. Brahim Diaz penalty chuan a penalty hlawhchhuah chu pet in, Morocco champion pui theihna hun tha zet mai a nei. Diaz panenka penalty kick hi Senegal si nghak Édouard Mendy chuan awlsam takin a lo man a, Morocco in goal thun theihna hun tha an neih an chhawr tangkai zo lo.
Diaz-a’n penalty a thelh hnuin inkhel a tawp zui nghal a, hun pangngaiah chak zawk an awm thei lo. Extratime khelh chhunzawm niin, goal a lut ta thuai thung. Fuh taka an khingpuite an nawr let hnuin Senegal tan Pape Gueye chuan minute 94-naah pui zeta pet goal in hmahruaina goal a thun.
Hnual taka awm Senegal in goal an thun hmasa hian inkhel boruak a thlakthleng hlawk a, an si phurh sut ngei tumin Morocco in tan an khawh zui nghal char char. Na taka an khingpuite nawrin, goal thun theihna hun tha nei bawk mah se an vanneih ni a lova, Morocco in goal an thun thei lo tluan. An si phurh an sut theih loh vangin an mualah ngei champion tuma tan khawh Morocco an tlawm a, uiawm takin an champion zo ta lo a ni. Kum 50 chhung zet an nghah tawh Diaz penalty thelh vanga an nghak chhuak zo lova, AFCON-ah an champion zo lo fo hi Morocco hian an ui vawng vawng hle ngei ang.
Pathianni zana khelh zawh tak AFCON 2025-ah Senegal an champion theih nana thawhhlawk tak Sadio Mane chu player tha berah thlan a ni a. Uiawm taka penalty thelhtu Brahim Diaz chuan Gold Boot a dawng a. Morocco si nghak Yassine Bounou chu si nghak tha berah thlan a ni bawk.
AFCON ah vawi hnih ngawt Senegal champion pui theitu Sadio Mane hian fak a hlawh tak zet. Penalty chawitir an nih vanga player tam zawkin khelmual an chhuahsan lai pawhin a chhuah ve duh lova. Inkhel hmachhawn zui leh tura a player puite hmintu niin champion thei tura team fuih phur a, huaisenna petu niin nunze mawi leh ropui lantirtu ennawm ropui a ni.