Senegalese police chuan mi 14 manin an ram leh France inkara naupang laka mipat hmeichhiatna hawia hma la thin pawl, paedophile gang hmalakna an tikeh niin an insawi.
An mi mante hi Senegalese vek niin ‘ram dang nena inzawm’ mi sual pawl an ni a, kum 2017 atanga hma lo la thin tawh niin police thuchhuah chuan a tar lang.
An pawl hian ‘naupangte mipat hmeichhiatna an hmanpui a, kum 15 hnuai lamte an pawngsual a, an mawngkuaahte pawh an pawngsual a, HIV/Aids thehdarh zawngin an che’ niin an sawi a. Mipa naupangte chu HIV kai mipa dangte nen invenna hmang lova inpawl tura tiluiin an thla an laksak thin bawk niin an sawi.
Mi palite hi April, 2025-a France-a French mi man tawh hnen atanga ‘pawisa inthleng nana’ a thupek anga thil ti niin an sawi bawk.
Mi 14-te hi Zirtawpnia Dakar leh an khawpui atanga chhimchhak lam km 200 vela hla, Kaolack-a hmunhma hrang hrang dap a nih hnuah man an ni a, judge hnenah pawh hruai an ni tawh.
Police chuan Pathiannia thu an chhuahah chuan an mi rinhlelhte in chu nasa takin hmun hrang hrangah an dap a, an pawi khawihna nena inzawmna nei ni ngeia ngaih thil tam tak an mansak tih an tar lang.
“DIC (Criminal Investigations Division)-in lian takin beihpui an thlak a, ram dangah pawh inzar pharh mi sual pawl lian tak, a bik takin France leh Senegal inkar vela che thin hai chhuah a ni,” an ti.
Thuchhuah chuan beihpui thlak hi Senegal leh France thawhhonaa neih a nih thu leh French officer aiawhte pawh an tel tih an sawi.
Police chuan hetiang pawikhawihna ang chi leh thil dang pawh, ram danga inzar pharha che thin ang chu hai chhuah zel an tum tih an sawi a. Mipuite pawh hetiang an hria a nih chuan hrilh tura ngenin a hrilh theihna, a thlawna biak theih number pawh an siam.
Senegalese police-in naupang laka sex kaihhnawiha che thin pawla mi 14 man
