September-ah SEDP phase 2 sem zawh tum

Family Oriented SEDP Phase-2 sem tur chu sawrkarin September chhunga sem zawh vek hman a tum dawn.
SEDP Executive Board chu an chairman, deputy chief minister Tawnluia hoin Family Oriented SEDP Phase 2 kalpui dan tur relin Ningani khan an thukhawm a. Kumin September thla chhunga Family Oriented SEDP Phase-2 hnuaia tanpuina dawng tur ten an dawn kim theih dan an ngaihtuah.
Phase-2 hnuaiah hian beneficiary 60000 huam tura ruahman a ni a, a thawhkhatna kaltlang hian beneficiary-ten tanpuina sum Rs. 25000 theuh an dawng dawn. SEDP Executive Board chuan tuna FO-SEDP Phase-1 leh Phase-2 kalpui mek zawh hnuah hian chhungkaw thar 60000 huam leh turin Phase-3 kalpui leh an rel.
Eizawnna ngelnghet leh hmasawnna siam tura chhungkaw tinzawna duan, sawkar flagship program pawimawh tak Family Oriented Socio-Economic Development Policy (FO SEDP) kaltlang hian chhungkaw eizawnna bultanna siamsak leh tanpuina pek hmangin Mizorama mimal leh chhungkua, a tam thei ang ber dinhmun tha zawka hlankai tum a ni a. ‘Family oriented’ tih a nih angin, tanpuina hi chhungkua anga dawn tur a ni a, chhungkaw pakhat atangin beneficiary pakhat chauh awm theih a ni.
SEDP Executive Board thutkhawmah hian Mizoram State Planning Board vice chairman H Rammawi, deputy speaker H Biakzauva, SEDP Executive Board member MLA te, Planning & Programme Implementation department leh Finance department hotute bakah SEDP kalpuitu line department hotute an tel.