September thla hian Mizote nunah engtin emaw tak hian awmzia a nei a, “Ber” thla a intan tih hi titi a tling thin. September a lo thlenin Mizote’n an nghah Krismas rim an hre tan thin tiin a sawi theih ang. Kohhran lamah Beihrual thla a ni a, zan tina inkhawm zan a ni.
1918-ah Mizo Kristiante’n Beihrual an hmang tan a, vawiin thlengin Mizoramah Kohhran tinin September-ah Beihrual an hmang thin tia sawi ngam a ni.
Zosap missionary Zosaphluia (DE Jones) khan ama chanchin a ziahna bu-ah “Tih dan phung pangngai anga pulpit atanga thusawi bakah chhungkaw tlawh leh inkhawm thin bakah Mizorama chawlh thla, September hman tangkai dan tur te kan ngaihtuah a. Hemi thla hi favang awllen, hnuh lak leh buh seng inkar lai a ni bawk a, khaw hrang hrang tlawha Mizote an zin vah hun, a chang phei chuan mi dangte bei tura mahni khua emaw khaw dang emaw an vah chhuah hun a ni,” tiin a ziak.
“September thla (Beihrual thla) chanve hma lam zawng chu ni tin tlai tawngtai inkhawm kan nei thin a. Thla chanve hnu lam chu ring lote tlawh chhuahna hunah kan hmang thung a. Hetianga kan beihna avang hian rinthar tam tak kan nei a ni. Hemi thla chhung hi chuan Kristian zawng zawngin an tih theih tawk an ti a,” a ti bawk.
Beihrual hi a tirah chuan June thlaah an hmang; 1906-a harhna hmasa ber a thlen khan ringtu an pung chak hle a, mahse a hnuah ringtute an harh lo ta deuh deuh a ni awm e. Chung lai chuan Mizoram Hmar chan hi Khasi Synod hnuaia Presbytery pakhat a ni a, kum khatah vawi hnih- March leh October-ah Inkhawmpui an nei thin. March ni 15-18, 1918 Presbytery Inkhawmpui, ‘Aijal’-a neih chuan 1918 June thlaa “Kristian Beihrual-na” hman an rel a, hei hi Beihrual lo chhuah dan a ni.
Beihrual chu nan hmang ta zel a, 1919 leh 1920-ah September-ah, 1921-ah January-ah ,1922-1924 chhungin April-ah, 1925 atangin mumal takin September thlaah an hmang ta nia hriat a ni. Hun a lo kal a, kohhran pawl dang a pian belh zel, kohhran pawl hrang hrangin September-ah Beihrual hi an hmang zel tiin a sawi theih.
September thla – Beihrual thla
