Thawhlehni khan Regency Hotel Conference Hall-ah Senate of Serampore College hotute leh Mizoram Kohhran hrang hrang hruaitute an inkawm. He hun hi Board of Theological Education of the Senate of Serampore College (BTESSC) te huaihawt a ni a, Senate of Serampore College atangin an officer pathum – Rev. Dr. Limatula Longkumer, Senate Registrar te, Rev. Dr. Rodinmawia Ralte, BTESSC Secretary & Dean, Senate Extension Programme leh Dr. Aswathy John, Dean, Senate Research Department te an tel. Mizoram Kohhran hrang hrang, Presbyterian Kohhran, Baptist Kohhran, Lairam Isua Krista Baptist Kohhran, Evangelical Church of Maraland leh Salvation Army te atangin Kohhran hruaitu mi 45 an tel.
He inhmuhkawmna (meet) hi Theological Education (Pathian thu zirna) leh Kohhran inlaichinna a lo ngheh zel theih nan leh thawhhona tha a awm zel theih nana buatsaih a ni a, Kohhrante hian Pathian thu zirna eng ang chiah nge kan duh tih te, engtiangin nge Senate of Serampore College hnuaia Pathian thu zirna hi kalpui ni se kan duh tih te, Bachelor of Divinity (BD) leh Bachelor of Theology Curriculum ennawn mek a ni a, Kohhranho hian eng ang subject te nge kan ngaih pawimawh tih te leh thil dang tam tak an sawiho a ni.
Board of Theological Education of the Senate of Serampore College College (BTESSC) hian an hotupa Rev. Dr. Rodinmawia Ralte kaihhruainain India ram khawpui hrang hrangah hetiang inhmuhkhawm hi kumin chhungin an lo nei tawh a, Kottayam, Kerala, New Delhi, Hyderabad, Chennai, leh Guwahati-ah te Kohhran hruaitu lawkte an lo kawm tawh. Kolkata, Mumbai leh hmun dangahte la buatsaih zel an tum.
Senate of Serampore College hnuaiah hian affiliated college 70 vel a awm a, India ram leh Bangladesh leh Sri Lanka-ah te Senate affiliated college hi a awm bawk. Mizoramah hian Senate affiliated college pali a awm a, Aizawl Theological College, Academy of Integrated Christian Studies, Missionary Training College, leh Maraland Theological College te a ni.
Hetiang programme huaihawt a ni hi Kohhran hruaitute’n lawmawm an tih thu an sawi.
Serampore College hotute leh Kohhran hruaitute inkawm
