Serchhip district-a VC inthlanah
zaa 90 vote tla turin tan la dawn
Village council inthlanpui 2020 khan Serchhip district-ah za zela tehin 80.6 vote a tla a. Kumin inthlanah zaa 90 vote a tlak theihnan Serchhip district election officer, bawrhsap Paul L Khuma hoin tan lak tum a ni.
Zirtawpnia hemi kaihhnawiha thutkhawmah DEO chuan, inthlanah vote a tlak that chuan democracy a chak tihna a ni a; vote tla tha turin DEO office chauhin hma an la thei loa, khawtlang hruaitute leh mipui mimir nen tanho a pawimawh tih a sawi.
Chhungtin hnenah vote thlak tura ngenna lehkha a thawn dawn tih Paul L Khuma hian sawiin, Serchhip district-a vote nei, zirna leh thil dang vanga district pawna awmte pawh social media kaltlanga lehkha thawnin, vote thlak turin a sawm dawn tih a sawi. Heng sawmna hi a dawng turten an dawn ngei theihnan YMA, MHIP leh MJA ten an tanpui dawn tih a sawi a ni.
MPF chu kum upa leh harsatna dang vanga polling station thleng theilote tanpui tura ngen an ni a. Polling booth pathum thlang chhuakin Govt Serchhip College Electoral Literacy Club chuan help desk an siam dawn tih sawi a ni.
Serchhip Field Veng chu intlar ngai loa vote thlak theihna tur ‘Queueless Polling Station’ atan thlan a ni a. Rei tak tak vote thlak tura intlar leh nghah ngai loin chhungtinten vote an thlak hun tur hunbi siamsak an ni dawn tih sawi a ni bawk.
Serchhip district-a VC inthlanah zaa 90 vote tla turin tan la dawn
