September thla chhunga Poshan Maah hmanna kal zelah Serchhip ICDS Project buatsaihin Thawhlehni khan Serchhipah Fruit Festival cum Sale neih a ni.
Hmanpuitu Women & Child Development joint secretary Zonunthari chuan naupangten chaw tha khamkhawp eia nun bul an tan theih nan zirtirna tha inpe a; anemia laka nu naupai, nau pawm leh tleirawlte venna tur leh, eitur hrisel ei kawnga mitinin hma kan sawn zelna’n POSHAN Maah hi hman a ni tih a sawi.
Poshan Abhiyaan hi 2018 March 8 khan Prime minister-in a hawng a, Mizoramah pawh hemi ni vek hian hman tan nghal a ni. He Mission tum ber chu, naupang zingah thanthu (stunting), taksa rihna leh san zawng nena khaikhina zang lutuk (underweight), nausen pianghlim buk zang lutuk, chaw tha hmuh mumal loh avanga nu naupawm leh tleirawlten thisen tlakchhamna (anemia) an vei thin te a lo rem theih nan Anganwadi Centre kaltlanga naupang enkawl leh zirtir a ni.
Eitur tha ei inzirtina, Poshan Maah hi September 1 atangin Serchhipah hman tan a ni a. A kar khatnaah Infant and Young Child Feeding inzirtirna hun hman niin, kar hnihnaah anemia test neih a ni a, Health department nena tangdunin naupang 700 vel test an ni. Kar thumnaah indigenous sports neiin Serchhip Field Veng YMA Chhang nen hun an hmang a; a kar tawp berah Fruit Festival buatsaih a ni.
Ni khat awh Fruit Festival cum Sale-ah hian thei chi hrang hrang leh thei atanga siam – jam, juice, squash leh chhang chi hrang hrang lei tur a awm a. Zotui Orange Producer Company, Lellen Amla Processing, S&R Food, Darei Banana Food Processing Industry, Kimkim Food Proecessing Industry te an tel a ni.
Serchhipah ei-in tur tha ei inzirtirna pual hun hmang
