Nimin khan Serchhip district-a HIV/AIDS/STI awareness campaign hawnna chu Serchhip DC Paul L.Khuma hovin Serchhip Auditorium-ah neih a ni.
Intensive IEC Campaign – ‘India fight against HIV/AIDS & STI’ tia vuah HIV/AIDS leh mipat hmeichhiatna hman khawloh a\anga inkaichhawn theih natna laka kan fihlim theih nana awareness campaign hi India ram pumah neih niin Mizoramah pawh district hrang hrangah neih mek a ni a. Serchhipah chuan nimin zing khan HIV/AIDS awareness rally hmanga bul tan niin zirlaite leh mipui \hahnem takin Serchhip AOC kawn a\angin Serchhip Auditorium thleng kawng an zawh a ni.
Rally neih zawha programme neihah Paul L.Khuma chuan thusawiin HIV/AIDS leh STI inkaichhawn dan te, heng natna laka inven dan te leh a dona kawnga hma kan lak dan te hi kan hriatchian a tulzia a sawi a. Natna tihbaiawm tak ni mah se, nun kan fimkhur chuan kan kai lo thei a ni tih hria a, tawng pawng hlauh loh tur a nih thu te leh a veite pawh thinhrik mai loh tur a nih thu te a sawi a ni.
Kum 1981 khan HIV/AIDS natna hi hmuhchhuah a ni a, South East Asia-a he virus hmuh a nih hmasak ber chu Thailand-ah 1984 kumah a ni a. Mizoramah hian kum 1990 atanga September 2023 thleng khan HIV positive mi 29,514 an awm tawh a. India ram pumah mihring cheng zat a\anga chhutin Mizoramah hian HIV positive an tam filawr hle a ni. Serchhipah hian July 2003 atanga July 2024 chhung khan mi 49,811 test zingah mi 621 positive hmuhchhuah a ni a, hei hi za zela chhutin 1.99% a ni. Serchhip district pumpuiah kum 2023-2024 chhung hian HIV positive hmuhchhuah zat chu 84 a ni a, hei hi za zelah 2.8% a ni. HIV inkaichhawn dan chi hrang hrang zingah mipat hmeichhiat hman khawloh atanga kai an tam ber a, HIV positive hmuhchhuah zinga za zela 60% hian sex a\angin an kai a ni.
Intensive IEC Campaign – ‘India fight against HIV/AIDS & STI’ hi kalpui chhunzawm zel a ni dawn a. Zirlai naupang te tan musicial drama competition te, debate competition te, poster insiamsiak te buatsaih a ni a. September ni 13, Zirtawpni hian lawmman semna hun hman a ni dawn a ni.
Serchhipah HIV/AIDS awareness beihpui thlak
