Serchhipah paraglider intawkkhawm dawn
December 10-15 chhung hian Serchhip chuan International Paragliding Accuracy Championship & Aero Sports Festival 2024 a thleng dawn a, vawiin – December 9 hi pilot-te tan inziahluhna hun leh a tul tul inbuatsaihna hun atan hman a ni ang. Hemi rual hian paraglider-te tumna tur (landing site) – Zawlpuiah Nghakuai Khai Runpui neih a ni dawn a, silai Inkahsiak buatsaih a ni bawk ang.
December 10-ah inelna neih tan a ni dawn a, Serchhip district bawrhsap Paul L.Khuma’n intihsiaka tel pilot-te a vailiam dawn a ni. Federation Internationale Aeronautique (FAI) kaltlangin ram 12 atangin pilot 79 an inziaklut tawh a, an lo thleng kim thawkhat tawh tih sawi a ni. A chhimtu mipui tan paragliding tandem flight neih tan a ni tawh a, hot air balloon-a chuan theih a ni dawn bawk.
Bawngchawm Serchhipa paragliding site-ah hian Mizoram Aero Sport Association (MASA) hmalakna in national level training programme buatsaih a ni tawh bawk a. India ram pum huapin thalai 70 chuang chuan paragliding pilot ni thei turin training an lo paltlang tawh a ni.
Aero Sport Festival neih chhung hian ei tur chi hrang hrang, handloom, thei leh thei tui, dil sangha man thar leh thil dang zawrhna tur stall 15 siam a ni dawn.
District Fisheries Development Office leh Serchhip District Fish Farmers Association tangdunin paraglider-te tumna tur Zawlpuia Nghakuai Chiah Runpui neihnaah hian Fisheries department stall a awm dawn a, hetah hian sangha man thar hlim tuihnai tak tak, sangha, bawngsa, arsa leh vawksa fry te ei tur a awm dawn a, a bul lawkah silai inkahsiak a awm bawk ang.
Ram 12 – Saudi Arabia, Kosovo, Albania, South Korea, Spain, Singapore, Malaysia, Indonesia, Mongolia, Nepal, Kazakhstan leh India ram chhung atangin paraglider 79 an tel dawn a. Event pakhata tel tur a, ram dang mi kan neih tam ber tum a ni rih nia sawi a ni. China leh Germany atanga lo tel tumten visa lamah harsatna an neih avangin an lo la thleng thei rih lo tih sawi a ni.
Festival khar ni – December 15 hian chief minister Lalduhoma leh Tourism minister Lalrinpuii ten an hmanpui dawn a ni.
Serchhipah paraglider intawkkhawm dawn
