Mizoram State AIDS Control Society (MSACS), District Hospital Serchhip Blood Centre leh Association for Voluntary Blood Donation (AVBD) Serchhip Branch huaihawtin Thawhlehni khan Serchhipah ‘World Blood Donor Day 2026’ pualin thisen petute chawimawi an ni.
Hmanpuitu District Information & Public Relations officer R Vanneihtluanga chuan, thisen pek chu midang nunna chhanna pawimawh tak a ni tih sawiin, “Thisen kan pek hian mi nunna kan pawhsei sakin kan chhan a ni mai loa, thisen mamawhtu, retheihna avangte, natna khirh tak avangtea indawm kun mekten, hetianga a thlawna thisen kan pek thin avang hian thlamuanna hlu tak an neih phah thin a ni,” a ti. Thisen pek ngaipawimawh a, midang tana malsawmna nih tum zel turin a chah.
District Hospital Blood Centre-a officer Dr Lalruatliana Pachuau leh AVBD Serchhip Branch president Zonunsanga Kawlni te pawhin thu an sawi a. 2025 April 1 leh 2026 March 31 inkara District Hospital Serchhip Blood Centre-a tlawmngaia thisen petu pawl hrang hrang 29 hnenah lawmthu sawina leh chawimawina thilpek hlan a ni.
Hemi hun chhung hian District Hospital Serchhip Blood Centre-ah thisen unit 690 pek a ni a; heng zinga unit 590 chu a thlawna pek (voluntary) a ni. Blood Donation Camp tum 31 huaihawt niin pawl pahnih chuan tum hnih an pe hman. Hemi hun chhung vek hian thisen unit 560 pekchhuah a ni.
World Blood Donor Day hi kum 2004 atang khan kumtin June 14-ah hman thin a ni a, kuminah Pathiannia a tlak avangin Serchhipah chuan June 16 khan hman a ni.
Serchhipah thisen petute chawimawi
