Daily Newspaper

Serie A-ah C. Ronaldo record thar

16

Thawhtan zan khan Italian Serie A-ah inkhel pawimawh tak a awm a, champion lai Juventus chuan an elui lian Lazio chu 2-1 in an hneha champion an hnaih zel. Lazio lakah hian Cristiano Ronaldo chuan goal khat a thun a, Serie A-ah record thar a siam.

Turin khawpuia inkhelah hian team hnihte an inhnehtawk viau a, chawlhlawk hmain goal lut a awm lo. Chawlhlawk hnu lamah erawh tha zetin Juventus an inlan a, minute thum chhung lekin goal hnih an thun hman. Minuite 51-naah Bastos handball vangin penalty an hlawhchhuah chu Cristiano Ronaldo chuan a pet goal a, hmahruaina goal a thun. An mikhual lakah hma an hruai hnuin Juventus hian an khel tha leh zual a, goal dang an thun zui leh nghal. Minute 54-naah Paulo Dybala ball pek atangin C. Ronaldo chuan an goal hnihna a thun zui leh nghal.

Hun rei tak chhung si hnih an phurh hnuin hun tawp dawn hnaih minute 83-naah Lazio hian penalty an hlawhchhuak a, Ciro Immobile chuan pet goal in an si phurh a sut then. Khualmualah point hlawhchhuah beisei hle mahse goal dang an thun belh thei lova, tlawm zawkah tangin, a hniam lam an pan zel rih. Lazio hi Juventus umtu ber kha an ni thin a, tunah chuan table-ah palina an luah phak tawk chauh tawh.

Lazio lakah an chak leh tak vangin Juventus in champion an hnaih zel a, khelh hmabak khelh li an la neihah champion turin point li chiah an mamawh tawh. Point li an hlawhchhuak thei a nih chuan Maurizio Sarri chuan a vawikhat nan Serie A title a hlawhchhuak dawn. Pahnihna Inter Milan nen an inkarah point 8 a tla zep mek a, Inter hi an tlawm zeuh emaw, an chak zo lo emaw a nih chuan Juventus hian champion turin point an mamawh tlem leh zual ngei dawn a ni.

C. Ronaldo record thar
Lazio laka goal hnih thuntu Cristiano Ronaldo khan Serie-ah goal 51 a thun tling chiah a, record thar siam in, Serie A-ah goal 50 thun tling rang ber a ni. Real Madrid atanga Juventus a zawm hnuin Ronaldo hi a chetha zui nghal a, Serie A-ah vawi 61 khel tling tawhin, goal 51 zet a thun der tawh a ni.

Serie A topscore nih tuma inelna boruak a nung thar hle a, Cristiano Ronaldo hi a chunga awm reng thin Ciro Immobile chu a tluk der tawh. Ronaldo leh Ciro Immobile te hian goal 30 an thun tling ve ve tawh a, khelh li khelh hmabak la awma an chet phungin top-scorer an nih leh nih loh a hril thui hle dawn. Ronaldo leh Immobile te hi European Golden Boot dawng thei dinhmunah an ding mek bawk a, goal thun tam ber ni mek Robert Lewandoski goal thun goal 34 chu lehpelh theihna hun tha tak an la nei. Ronaldo hi Serie A top-scorer a ni thei a nih chuan Juventus player zingah Aless-andro del Piero dawta dawng thei hmasa ber a ni ang. Kum 2007-08 khan Del Piero hian goal Serie-ah golden boot a dawng a, hemi hnu hian Juventus player zingah dawng thei an awm zui ta miah lo va, champion erawh an ni ngun hle tho thung.

C. Ronaldo leh Ciro Immobile te hian season kal mekah penalty atangin goal 12 an thun tling ve ve tawh bawk a, 1995-96 dah tawhah Serie A-a season khat chhunga penalty atanga goal thun hnem Lazio player Giuseppe Signori record siam an nihrual dun a, pakhat zawk zawk hian record thar siam zawk an awm hmel ta hle a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy