Site icon The Aizawl Post

Serie A hmahruaitu Napoli mualpho

talian Coppa Italia last-16 penalty shootout-ah Italy top flight-a a mawng-phah luahtu Cremonese hneh loin Serie A hmahruaitu Napoli an tlawm a, kartir lama an inkhelhna hi Naples khua a la ni leh zel lehnghal!

Cremonese hian first half minute 18-na leka Charles Pickel goal thun hmangin mikhual team an barakhaih zet a; Napoli beilet hian minute 33-ah Juan Jesus goal hmangin an siphurh an sut ve leh mai a, chuti china duhtawk mai loin minute thum hnuah Giovanni Simeone chuan mualneitu team hmahruailetna goal a thawh ve leh a, Napoli hi nuamsaa chak thei tura beisei an ni.

Hun pangngai tawp hma minute thum chiah awm tawhah Felix Afena-Gyan chuan mikhual siphurh a sut ve leh ta tlat a, extra time-ah Cremonese player Leonardo Sernicola hnawhchhuah a ni chungin mikhua team lamin shootout an nghakchhuak a, 5-4 hnehna nen 2019-20 champion Napoli an hnawtchhuak.

Stanislav Lobotka chuan Napoli spot-kick vawilina thelhin, Cremonese player pangin an chhuihlut vek thung.
Luciano Spalletti team hian karliamta Zirawpnia 5-1-a champion thang Juventus an sawp hnu khan Serie A table-ah point kuain hma an hruai fal mek a; Coppa lama an tlak fel tak avang hian tualchhung league lama an hmahruaina humhim turin an insawrbing zual zawk thei tawh ang.

Cremonese kha tun season league-a chak la lawm ve miah lo team niin, table mawngphah an luah nghet tawh hle a, point kua ngawtin hmunhim an hlat tawh.

Exit mobile version