Serie A season thar
tanna inkhel thlirna
Inrinniah champion lai Napoli chuan sihnih faia mualneitu Sassuolo hneh chungin an title kawl lai humhim tura an chetchhuah vawi khatnaah point thum an thawkchhuak nghal a; Pathianni zanah Juventus pawhin sihnih faiin an mikhual Parma an hneh ve bawk.
Allianz Stadium-a Juve goal hmasa zawk hi darkar khat an khelh tlin hma chiaha striker Jonathan David-a tihluh niin, he Canada striker hi kumin July thla khan Turin club chuan Lille atangin an senglut a, kum nga daih tur contract ziahpuiin, a debut-ah Kenan Yildiz-a siamsak atangin goal a thun nghal.
Hun tawp hma minute sarih la awmah a ban hmanga Parma player Mathias Lovik a tawk avangin Juventus full-back Andrea Cambiaso chu straight red card hmanga hnawhchhuah a ni a, mahse, mikhual team beiseina hian a daih rei lo kher mai a, referee-in red card a phawrh atanga minute khatna lekah substitute Dusan Vlahovic chuan sihnih faia home team hmahruaina a khung ve leh.
Counter-attack atanga he Serbian goal pawh hi goal hmasa zawk siamsaktu Yildiz-a chhawp leh bawk a ni.
Mipui 41,251 hmaah Germany rama piang, Turkey international ni ta Yildiz hian a ma pualin goal khung lo mah se Old Lady tana goal hnih siamchhuaktu a ni a, Parma goalkeeper Zion Suzuki tana harsatna thlentu a ni.
Pathianni inkhel dangah Como 1907 pawhin sihnih fai bawkin mikhual Lazio an hneh a, he goal hnih pawh hi second-half goal ve ve a ni.
Como goal hmasa zawk hi second half tan hnu lawka Nico Paz-a through-ball kaltlanga Greece striker Anastasios Douvikas tihluh niin, minute 73-ah Paz hian 30-yard free-kick chhuihlutin an goal hnihna a hlawhchhuak.
Cesc Fabregas-a team Como-in hnehnain league season thar bul an tan a, Juventus chung chiahah awmin Serie A table-ah pahnihna an luah a, hmahruaitu Napoli ang bawkin point thum an hum mek.
Tarlan tawh angin, Inrinni khan Serie A champion Napoli chuan Sassuolo mualah 2-0 hnehna changin an title kawl lai humhim tura an bultanna inkhelah chetsual an duh lo!
MAPEI Stadium – Citta del Tricolore inkhela Naples khaw team goal hmasa zawk hi minute 17-na leka Scotland midfielder Scott McTominay tihluh niin, Italy winger Matteo Politano siamsak a ni.
Kum 28 mi McTominay hian kum 2024-a Manchester United chhuahsana Napoli a zawm hnuah league game 34 atangin goal 12 a thun tling ve ta a; season liamtaa Antonio Conte team-in Italian top flight title an lakna kawngah a khel tha a, Serie A MVP award a dawng hial a ni.
He Scot hian inelna hrang hrangah Italian team tan match 37 atangin goal 14 a khawl tling tawh a, 2025 Ballon d’Or award nominee pawh a ni ve pha hial.
Second half tir lamah Belgium tana match 111 khel tling tawh midfielder Kevin de Bruyne chuan a Napoli debut-ah goal a khung ve leh.
Kum 34 mi ni tawh De Bruyne hian Manchester City-a kum 10 zet a khawsak hnuah kumin nipui thawt lai hian free transfer-in Italian champion a zawm a, a bultanna inkhelah a la tar lo tih lantirin goal a khung nghal.
Hun tawp hnaih lama beihlet ngawrh hun chhoh lai takin Sassuolo on-loan Marseille midfielder Ismael Kone chu yellow card vawi hnih hmuh vangin hnawhchhuah a ni a, chu chuan an tan a tiphet zual zui ta a ni.
Inrinni inkhel dangah mualneitu AC Milan chu an mikhual Cremonese lakah 1-2-in an tlawm a, table-ah 16-na luah chungin league bul an tan!
Serie A season thar tanna inkhel thlirna
