Sorkar laipui chuan Thawh\anni khian all-party meeting a ko va, a tuk lawk chu tun thla tir lama Union Minister Pralhad Joshi an Parliament special session ni nga awh a koh in\an hun a ni bawk a. He meeting-ah hian special session-a agenda tur te sawiho a nih rin a ni bawk a. Session hi parliament building hluiah \an niin September 19-ah a tharah insuan a ni dawna sawi a ni.
Special session koh hi opposition leader te chuan agenda pawh sawilan a nih loh avangin an awisel nasa hle a. MP tam tak te chuan BJP sorkar chu Thawhlehni chu India a festival pawimawh ber Ganesh Chaturthi a ni chunga ko luiah puhin an sel na hle.
“Special session chu India a festival pawimawh ber Ganesh Chaturthi laia koh hi Hindu sentiments kalh a ni a. A hun an thlanah mak kan ti hle a ni” tiin Shiv Sena UBT MP Priyanka Chaturvedi chuan a sawi a. Nationalist Congress Party’s Supriya Sule pawhin a hun sawn turin a ngen bawk.
Congress chief hlui Sonia Gandhi thung chuan Prime Minister Narendra Modi hnenah lehkha thawnin eng vanga special session chu political party dang te rawn lova ko nge a nih tiin zawhna a siam thung a.
“Tute mahin eng nge agenda kan hre lo va. Kan hriat zawng chu ni nga chhung zet ‘sorkar business’ ngaihtuah a ni ang tih chauh a ni” tiin Prime Minister hnena a lehkhathawnah a ziak a. Sonia Gandhi chuan centre-state inlaichinna te, communalism nasa zual zel te, ramri buaina China nena neih chungchang te chu sawiho ni se tiin a sawi bawk.
Special Session Agenda?
Sorkar lam chuan session agenda zingah Amrit Kaal chungchang leh India ‘developed nation’ a nih theihna tur lam a tel mai thei an ti a.
Hei bakah hian sawiho tur zingah Chandrayaan-3, India in hlawhtling taka Moon mission a neih te bakah nasa taka fak a hlawhna September 8 leh 10 a Delhi a G-20 Summit thlen chungchang te pawh ni theia ngaih a ni.
Tun session neih tur hi India tih chu Bharat tia thlak theihna tur boruak awm leh inhnialna nasa tak awm mek chuan ngaihven a hlawhtir zual bawk a. G-20 invitation President Droupadi Murmu in a pek chhuaha ‘Bharat’ tih a hman chuan inhnialna nasa tak a la siam zui zel a, sorkar chuan ram hming thlak a tum tia ngaihna pawh a nasa hle a ni.