Daily Newspaper

Sevilla lakah Wolves an vanduai

13

Thawhleh zan khan Europa League quarter final khelh zawh a ni ta a, Sevilla lakah vanduaiin Wolves in semi final an lut zo lo va. Shakhtar Donetsk chuan FC Basel sawpin semi final an lut ve thung.

Wolves vanduai
Premier League club Wolverhampton Wanderers chuan Europa League-a champion ngun ber Sevilla chu quarter final-ah an hmachhawn a, hma taka hmahruai theihna hun tha an hloh va, hun tawp dawn tepah goal chhuahin an vanduai a kaltluang a, semi final lut zo lovin, uiawm takin an tla.

Europa League-ah vawithum champion zawn thei hmasa ber Sevilla lakah Wolves hian tha takin bul an tan a, minute 13-na lekah penalty an hlawhchhuak. He penalty hi Raul Jimenez chuan a pet a, si nghak tin a lo dansak. Penalty pet tura Jimenez a tlanchhuah laiin Sevilla player Diego Carlos chu dan bawhchhiain a tlanlut a, si nghakin ball a dan ber hi a tauhchhuak zui a, a team a chhanhim. Diego Carlos dan bawhchhiat hi Wolves lam hian complain mahse awmzia a nei lova, VAR a lo mutthluk lai tak a ni bawk si a, pet nawn leh ngei tura ngaih a nih laiin pet nawn a ni ta lo. Wolves midfielder Ruben Neves chuan inkhel thununtu (referee) pawhin VAR hian ho lam takin a lo hmu lo (muthlu) ngei a pawm tih a sawi thu a tarlang zui ve bawk.

Penalty an thelh hnu hnian hun rei tak chhung goal lut awm lovin an inhnehtawk a, inkhel hmuhnawm a tling. Spain club Sevilla hian inkhel an thunun zawk a, goal thun tumin shot pawh an nghah zawk. Minute 90 chhungin chak zawk an awm hman dawn lo emaw tih hnuah Sevilla an chefuh ta nge nge a, minute 88-naah Ever Banega siamsak tha tak chu Lucas Ocampos chuan chiang zetin a tauh goal a, hmahruaina goal a thun ta nge nge. Nuno Espirito Santo-a team ten an si phurh zut tumin tan khawh zui mahse hun a tlem tawh vangin goal an thun thei tawh lo va, hre tak chungin tlawm zawkah an tang ta a ni.

Semi final-ah United hmachhawn tur Sevilla hi an khel tha tluang hle a, inelna hrang hrangah khelh 19 chhung tlawm nei lovin an kaltluang tawh. Tun Uefa Cup/Europa League ah semi final an luh vawisarihna chiah a ni a, vawiriat semi final lut tawh Inter Milan chiah an ni aia semi final lut tam an awm. Sevilla hian tualdawih khelmualah English club te an ngam thei viau mai a, vawithum an hneh zawn tawh. Kum 2006 khan 4-0 in Middlesbrough an hneh a, 2016 khan 3-1 in Liverpool an hneh leh bawk. Semi final-ah Manchester United an hneh leh a nih chuan EPL club lakah record tha tak an neih belh dawn a ni.

Uiawm taka Sevilla an hneh loh tum hian Wolves defender Romain Saiss chuan Yellow card a hmu a, 2019-20 season-ah yellow card vawi 14 zet a hmuhna a ni a, EPL player zinga Yellow Card hmu hnem ber a ni.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy