Union Home Minister Amit Shah-a chuan Manipur chief minister hlui, N Biren Singh-a chu New Delhi-a a chenna inah lengah sawmin an inkawm a, an state-a mipui sorkar din lehna tura hmalakna an sawi dun nia hriat a ni.
Shah-a leh Singh-a hi Zirtawpni zana inkawm an ni a. Shah-a pisa hian tukah Biren-a hi biain home minister chenna ina inbe tur hian sawm a ni tih an sawi a. An inkawm chungchang erawh BJP emaw, union home ministry emaw pawhin engmah thuchhuah an nei rih lo thung.
“Darkar khat dawn an inkawm a. Zirtawpni zan dar 10:00 hnu lamah an tan chauh va. President’s Rule-a awm mek Manipur-a mipui sorkar din lehna tur kawngte an sawi dun a. Sorkar a din lehna tura a bulthuta tih ngaite leh hmabak la awmte an sawi deuh ber a ni,” tiin Manipur sorkar hotu pakhat chuan a sawi.
Sorkar tung ding leh tur emaw, chief minister thar tur thlan hun tur emaw bituk a awm lo niin a sawi a, sorkar laipui erawh chuan mipui thlan chhuah sorkar din leh ngei a duh a, thla 11 hman tawh President’s Rule chu tihtawp tawh an duh niin a sawi.
Tun tum hi Home Minister Shah-a’n chawlhkar hnih chhunga Manipur chungchanga mi a kawm vawi hnihna a ni.
January 2 khan Governor Ajay Bhalla, Security Advisor Kuldiep Singh, state chief secretary leh police chief te chu an state-a himna dinhmun sawipuiin a lo kawm tawh a. Nilaini khan union home ministry aiawhten Kuki-Zo civil society aiawhte kawmin Manipur-a sorkar din leh chungchang leh an thil phut hrang hrangte an sawipui bawk.
A tukah ministry aiawhte hian sorkar laipui nena inkahhai, Suspension of Operation(SoO) inremna siam mek hel pawlte an inbe leh bawk a. SoO-a tel pawlte hian Kuki-Zo MLA 10-te chu sorkar siam a nih leh chuan an tel ve an duh thu an sawi a, sorkar thar chu Kuki-Zo hnamte awmna tlangram district tela inrelbawlna hran an neihna tura, union territory dinna tura hma an lak dawn chuan an thlawp dawn thu ans awi bawk.
Tar lan tawh thin angin May, 2023 khan Manipur-ah hian Meitei leh Kuki inkarah buaina nasa tak chhuakin mi 260 vel thi leh in leh lo tlanchhiatsan mi 60,000 chuang an awm mek a. Chi leh chi inkara buaina hi venhim hna thawktu sang tel dah belh an nih hnuah a ziaawm tawh rih a. Chief minister atanga Biren Singh-a bân hnu, February 13, 2025 atangin President’s Rule-ah an awm mek a ni.
February 13 hi President’s Rule-a an awm kum khatna tur a ni dawn a. December 14 khan BJP MLA (Meitei leh Kuki-Zo) te chu buaina chhuah hnua a vawi khat nan BJP General Secretary BL Santosh-a kaihhruaiin New Delhi-ah an thukhawm a, hei hi sorkarin an state-a sorkar din leh tura hma a lak tak tak tanna a ni.
May 3, 2023-a buaina a chhuah atang khan Kuki-Zo MLA 10-te chuan venhimna thil atangin Imphal an tlawh duh lo va, Biren Singh-a an thlawpna pawh an tinep hle bawk.
Shah leh Manipur CM hlui Singh-a’n sorkar din leh sawi dun
