Daily Newspaper

Shakhtar an hneh loh nawn hnua ban la tum lo Zidane

8

Thawhlehni zana Real Madrid zinchhuak chu an kawtkaia an ngam loh tawh Ukrainian profe-ssional football club Shakhtar Donetsk khel-mualah sihnih faiin an tlawm leh a, Champions League last 16 lut lo thut thei dinhmuna an din tawh hnuah an manager Zine-dine Zidane chuan banna thehluh a la tum rih loh thu a sawi!

Spanish giants hian Group B table-ah pa-thumna an luah pha awrh tawh a, chutih laiin an group-a team palite hi tlang thei dinhmunah an la ding vek a, karleha an match tawp ber an khelh chhoh leh tur hian knock out stage lut tur a hril dawn a, tlang turin Real hian karleh Nilainia hmahruaitu Borussia Monchengladbach an mikhual hunah Bundesliga club an hneh ngei ngei a ngai tawh.

Kumin October thla khan Shakhtar hian Spain leilung ngeiah Madrid hi 3-2-in an lo hneh tawh a, khami hnua Champions League game thum an khelh lehah an chak zo lo fai vek a, mahse, an zuam laklawh Zidane-a team an mikhual zanah hnehna chhinchhiahthlak an chang zui leh a, an group table-ah pahnihna luah chhoin, khelh ngaah Real nen point sarih ve ve nei mah se head-to-head record tehna hmanga an chungnun zawk avangin pahnihnaah an chho.

Tum 13 zet European champion ni tawh Madrid hi a zawna season 23 chhung tehreng Champions League group stage pel thei khawpa he tournament-a record nei tha ni mah se an dinhmun hi a him ta lo hle mai a, he boruakah hian an boss Zidane chuan a team chu last 16 lut tura theihtawp chhuahpui a la tum fan thu leh a zawna Champions League title vawithum a lakpui hnu May 2018-a banna a thehluh anga ban mai a la tum rih loh thu a sawi.

Real Madrid manager Zinedine Zidane chuan, “Banna thehluh ka la tum lo hi a ni tawp mai. Hun harsa leh khirhkhan hi chu kan tawn than a ni a, tunah pawh kan chechhe tluang leh mek a, mahse, kan la kal zel rih phawt ang.”

Inrinni liamta La Liga lamah Real hi Alaves tih ang duangin 2-1-in an lo barakhaih tawh bawk a, tualchhung football lamah pawh Zidane laka ‘pressure’ sang tak a inmun chhoh mek laiin Europe lamah pawh season khat chhungin Shakhtar tihte mai mai vawihnih an hneh lo tling ta a, French coach hmalam hun hi derthawng chho meka ngaih a ni.

Thawhlehni zana an tlawm leh chungchangah Zidane chuan a naute’n an khel tha a, kha aia result tha zawk kha an phu tih sawi chungin hnuai lam bih mai tur an la nih loh thu leh an game khelh leh tur lama an insawrbing zui a pawimawh thuin a naute a fuih sauh sauh a, “A tha zawnga boruak her-danglam tura kan mamawh chakna ka nei a, chumi tur chuan ka engkim hi ka hlan chho zel a, ka player-te pawh chutiang bawk chu an nihphung a ni,” tiin an harsatna tawh mek sutkian tuma an inhumruh mek thu a sawi.

Spanish champion hi La Liga table lamah pawh palina ni duai tawhin, tunlai hian hliamin a tibuai mek a, an player langsar leh man to taka an segluh ni bawk Eden Hazard a inhliam leh tawh a, an captain Sergio Ramos pawh hliam atangin a la thochhuak zo rih lo a, hei hi an chak loh fo chhan bulpui pakhat a tih loh theih loh a, mahse, tlarhma lama an rohlu ni kumkhua Karim Benzema chu European champion lallukhum an khum hnuhnunber tum kum 2018-a champion-na khelmual Olympic Stadium-ah khan a inlan leh thei tawh a, a team tlawm tur chhan zo rih lo mah se French striker inkhel leh thei hi an boss beiseina siamsaktu pakhat a ni thei ang.

Ukraine rama Real zinchhuak hian bul pawh an tan tha a, minute nga pelhah Marco Asensio chuan goal ban a tihper pawp a, Benzema pawhin goalkeeper Anatoliy Trubin a chettir dawt bawk. First half chhungin Trubin hian Real hmatawng pahnih goal thun tur a dang ve ve bawk.

Goal awm loin half time chawlh an hmang a, second half tir lamah Dentinho chuan mualnei-tu team hmahruaina goal a thun ta mai a, hun tawp hnaih lamah Israeli forward Manor Solomon chuan chiang zawka Shakhtar chakna goal a tilut ve leh a, October thlaa Real an hneh hma-sak hnu lam group game an khelh leh pathuma goal khat mah khung zo lo Ukrainian club-in an mikhual palian lakah chakpui tham goal hnih an thun a, Moncheng-ladbach laka an vawihnih tlawm belhkhawma goal 10 chhuah tling Shakhtar-in Group B-ah pahnihna an luah chho ta dawrh a, dinhmun him lo takah Real an ding zui ta a ni.

Tun season-ah Zidane leh a naute hi an nghet lo rei ta hle mai a, Alaves laka an tlawm leh hnu khan match thum zet tualchhung football-ah an chak zo ta lo a, Europe lam tala insiamthat an mamawh em em laiin an la thochhuak zo ta rih lo a, an fans tana Ukraine ram tlawmna tina zualtu chu Shakhtar lamin an team khawngber dawttu (second-string) hmanga hnehna an chang kha a ni ngei ang!

Real hian Monchengladbach mualah 2-2 draw an lo hlawhchhuak taw bawk a, Inter Milan laka hnehna an chan zawn khan an dinhmun chawikang viau bawk mah se Luis Castro team lakah vawihnih an chak loh ve leh si avangin an group atanga knockout stage lut tur a la chiang lo nuai a ni.

Inelna hrang hranga an game hnuhnung 11-ah Real hi vawili chiah an chak tling a, La Liga lamah pawh point sarih ngawtin hmahruaitu Real Sociedad an thlau tawh a, Europe club inelna lianbera knock out round thleng pha lo thei dinhmuna an din tak hial avangin Zidane-a dinhmun hi him lo chho taa ngaih loh theih a ni lo ang.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy