2023 MTV Video Music Awards-a award ngaihhlut Video Vanguard Award chu Shakira-i’n a dawng dawn a, he Colombian superstar hi tu kum 17 chhunga a vawi khat nan MTV VMA stage-ah a perform leh dawn ta bawk.
September ni 12 a sem tur 2023 MTV VMA-ah hian Shakira-i’n Video Vanguard Award a dawn hian record a siam dawn a, South American artist zinga he award dawng thei hmasa ber a ni dawn ta a, Latina artist zinga he award dawng thei pahnihna a ni bawk ang. Latina artist zingah Puerto Rican nupa kara Bronx-a piang Jennifer Lopez-i’n kum nga kalta khan a lo dawng tawh bawk a ni.
Tun hnaiah he category-ah hian hmeichhe lam an langsar riau a, Rihanna (2016), P!nk (2017), Lopez (2018), Missy Elliott (2019) leh Nicki Minaj (2022) ten an dawng a, 2020-21-ah khan he award hi sem a ni lo. Mipa zinga he award dawng hnuhnung ber chu Kanye West niin, 2015 khan a dawng.
Shakira hi VMA stage-ah han a perform nghal dawn a, 2013 atang khan Video Vanguard Award dawngtute hian an hla hit medley an la perform ta ziah a, Shakira pawh hian tun hnaia a hla hit ‘TQG’ leh ‘Bzrp Music Sessions, Vol.53’ te pawh a perform ngeiin a rinawm.
Kumin MTV VMA-ah hian Shakira hian nomination pali a nei bawk a, chung zingah chuan artist of the year, Karol G nena an zai dunna ‘TQG’ avangin best Latin collaboration leh ‘Acrostico’ avangin best Latin te pawh a tel.
Shakira hian VMA pali a dawng tawh a, a dawn hmasak ber chu 2000 kha niin, International Viewer’s Choice a dawng a, he category-ah hian 2002-ah award a dawng leh a, 2006-ah ‘Hips Don’t Lie’ avangin best choreography dawngin, a kumlehah Beyonce nena an zaidunna ‘Beautiful Liar’ avangin Most Earth Shattering Collaboration a dawng tawh bawk.
MTV VMA stage-a a inlanna hnuhnung ber chu 2006 kha niin, Wyclef Jean nen ‘Hips Don’t Lie’ an perform a, hemi kum hian he hla hi video of the year-ah nominate a ni nghe nghe.
Video Vanguard Award hi music video leh popular culture a a tha zawnga nghawng nei lian leh thawh hlawk te hnenah hlan thin a ni.
Shakira-i’n Video Vanguard Award dawng dawn
