Daily Newspaper

Shakuntala Devi trailer an tichhuak

10

Human-Computer an tih mai Shakuntala Devi chanchin tarlanna film ‘Shakuntala Devi’ chu a trailer an tichhuak ta a, he film-ah hian Bollywood star Vidya Balan chu Shakuntala Devi lemah a chang. A film hi May ni 8 a tlangzarh an tum tawh kha a ni a, mahse, hripui leng avangin an sawn a, July ni 31-ah an tlangzarh dawn ta a, online-ah stream tur a ni a, Amazon Prime Video kaltlangin an tlangzarh dawn a ni.

Shakuntala Devi hi November ni 4, 1929 khan Bangalore-ah a piang a pa chuan temple a puithiam nih aiin circus zawm a thlang a, trapeze artist, sakeibaknei khawi, hrui thlun mar zawh leh magic te a entir thin. Shakuntala pawh kum thum a tlin chuan a pain card trick a zirtirna lamah number chhinchhiah lamah a chak hle tih a hrechhuak ta a, a hnu lawkah circus chu chhuahsanin, khawvel hriatah a fanu thiamna chu a phochhuak ta a ni.

Lehkha zirna mumal pawh nei loin kum 6 a tlin chuan Shakuntala hian a arithmatic thiamna te chu University of Mysore-ah a entir thei der tawh. Tichuan, 1944-ah London-ah a pain a pem pui a, 1960s-ah India-ah an let leh a, Shakuntala Devi chu IAS officer Paritos Banerji nen inneiin, 1979-ah an inthen leh a, fanu Anupama Banerjee an nei. 1980-ah Lok Sabha inthlanah independent candidate niin Mumbai South leh Medak bialah a chuh a, Medak-ah hian Indira Gandhi nen inkhingin a tling zo ta lo.

1950-ah Shakuntala hi Europe-ah zinkualin, a arithmetic thiam thil chu a entir a, 1976-ah New York-ah a thiam thil a entir leh bawk. 1988-ah US-ah kalin professor Arthur Jensen-a’n a theihna chu fiah a lo tum a, Jensen hi University of California, Berkeley-ah psychology professor a ni.

1990-ah Jensen chuan Shakuntala Devi chungchanga a thil hmuhchhuah chu tichhuakin, Shakuntala Devi chu 6,16,29,875 cube root leh 17,08,59,375 seventh root zawng turin a ti a, Jensen chuan a notebook-ah zawhna chu a copy zawh hmain Shakuntala chuan a lo chhang hman tawh niin a tarlang.

1977-ah Southern Methodist University-ah Shakuntala Devi chu 201-digit number 23rd root an zawn tir a, second 50 chhungin a chhang dik hman a, a chhanna chu 54,63,72,891 niin, hei hi UNIVAC 1101 computer-in a chhut chhuah a ni a, he computer hi root lian tak tak chhut chhuak thei tura a bika duan a ni.

Shakuntala hian June ni 18, 1980-ah puntir lamah a thluak that zia entirin, digit 13 number pahnih puntir tur, Computer Department of Imperial College London-in an thlan chawp sak chu dik takin a chhang thei. Hemi tum hian 76,86,36,97,74,870 X 24,65,09,97,45,779 an zawt a, chung number pahnih puntir chhuah chu chhang dik thlapin a chhanna chu 1,89,47,66,81,77,99,54, 26,46,27,73,730. Heng an test-na hrang hrangah hian a chhut nan hmanrua engmah a hmang ngai lo a, a rilruin a chawk chhuak mai thin a ni.

1977 khan rilru-a thil chhut chak dan ziahna lehkhabu ‘Figuring: The Joy of Number’ a tichhuak a, hemi kum vek hian India rama mawngkawhurna chungchang lehkhabu ‘The World Of Homosexuals’ tih ziak lehin, a hnuah an interview-naah Shakuntala chuan mahni mipat pui mutpui thin pasala a neih thu a sawichhuak nghe nghe a ni.

April 2013 khan Shakuntala chu a thawkna lamah harsatna neiin damdawi inah dah luh a ni a, kar hnuh hnuah lung leh kal lamah harsatna neiin, April ni 21, 2013 khan, kum 83 mi niin a thi ta a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy