SHC inthlan neih dawn vangin
a kaihhnawih ramri gate khar
Sinlung Hills Council inthlan neih a nih dawn avangin a bul vela inter state leh district ramri inluhpawhna gate khar a ni.
November 5-a Sinlung Hills Council (SHC) inthlan neih turah campaign hun a tawp tawh a. He inthlana polling party-te chu vawiin, November 8 hian an chhuak tan dawn. SHC inthlan tur hian district pathum – Aizawl, Saitual leh Kolasib-a khua a huam avangin henga district election officer (bawhrsap) te chuan inthlan campaign hun tawp a nih thu leh a kaihhnawiha mipui hriat tur an puang a ni.
SHC huamchhungah inthlan felfai leh thianghlim a awm theihna tur leh, State Election Commission-in inkaihhruaina a siamte zawm a nih theihna turin political party leh candidate te tan campaign phal a ni tawh loa, constituency pawn atanga campaign tura kal, chu constituency-a vote nei si lo te chuan constituency an chhuahsan tawh tur a ni, an ti a. Hei hian candidate leh an election agent bakah party office bearer, state in-charge a ruat te a huam ve lo tih an sawi a ni.
Section 126A of the Representation of the People Act 1951 sawi angin, electronic media/ social media leh a tlukpui dangah inthlan kaihhnawih, mipui rilru sukthlek tidanglam thei thil tarlan/ chhuah phal a ni lo, tiin, hemi chhung hian mipui ngaihdan lakna ‘opinion poll’ siam leh ‘exit poll’ neih loh tur a ni tih an hriattir bakah vote thlak tan hun atanga a zawh hnu darkar chanve thleng phal a ni lo tih an sawi. He Act vekin a sawi angin, inthlan ni ah polling station atanga metre 100 huamchhungah vote dilna anga ngaih thei thil reng reng tih phal a ni lo tih a sawi bawk.
Aizawl district election officer hian vote thlak ni hma ni thum – November 2 atangin an huamchhunga inter-state/ inter-district ramri – Zokhawthiang, Khawpuar, Zilthawchhuah (Vaitin) leh Luakchhuah (New Vervek) chu inthlan zawh hma chuan khar a ni tih a hriattir a. Hei hi ramri kana khawtlangah leh kawngdanga inthlan tibuai palh thei thil duhawm lo a thlen lohna tura tih a ni tih a sawi.
SHC bial tam ber hi Manipur leh Assam ramri-a awm a nih avangin venhimna uluk taka kengkawh turin State Election Commission chuan district thuneitute leh SP-te a hriattir a. A bikin venhimna uluk zual ngai tura ngaih polling station-ah chuan venghimtu tam zawk dah tura tih a ni.
SHC inthlan neih dawn vangin a kaihhnawih ramri gate khar
