Kumin November 5-a Sinlung Hills Council inthlanpui neih turah bial 12 awm atangin candidate nih tum mi 50-te nomination paper chu endika pawm a ni.
Sinlung Hills Council-a bial 12-a inthlan turah hian October 11 kha hming pe lutte nomination paper endik ni a ni a, mi 50 zingah endikna paltlang zo lo an awm lo. Vawiin – October 14 chawhnu dar 3.00 thlengin inhnuhdawh theih hun hawn a ni.
Inthlan turah hian ZPM leh HPC (Hmar People’s Convention) party-in ro an rel mek a. An ni hi an thawkdun zui dawn a, bial 12 atangin ZPM-in bial 8 a chang anga, HPC-in bial 4 a chang ang. Inthlan hmasaa rorelna siamtu hmasa ber MNF chuan HPC (Reformed) a thawhpui dawn a, Congress party pawhin bial 12 hi chuh vekin, BJP-in bial 2 a chuh ang. Bial thenkhatah MNF leh Congress party inremsiamnaa inkianin, independent-a chuh tum an awm nia sawi a ni bawk. Hei bakah hian independent-a chuh tum hrim hrim an awm a ni.
Bial malah Khawlian, Tinghmun leh Saipum chu candidate tamna ber a ni a, candidate 6 theuh an awm. Phuaibuang bialah candidate 5 an awm a; Suangpuilawn, New Vervek leh Saiphaiah candidate 4 theuh awmin bial dang – Vanbawng, Ratu, Sakawrdai South, Sakawrdai North leh Zohmun bial chu kil thuma inchuhna a ni dawn.
Sinlung Hills Council hi 2018 July 5-a ding tan a ni a, 2019 November 5 khan a vawikhatna atan inthlanpui a hmachhawn a ni.
SHC inthlana bial 12 awmah candidate 50 an awm dawn
