Bank atanga self help group tana loan lachhuak a, lo eiruk saktua puh State Bank of India branch manager hlui leh a thurualpui pakhat chu court-in thiam loh a chantir a, a hremna tur chu July 1-ah tihchhuah a ni ang.
Prevention of Corruption Act Court special judge atanga thudawn danin, 2006 November leh 2007 October chhung khan chutih laia SBI Mission Veng Branch Aizawla branch manager Lalkhomang Guite leh a thurualpui Sacred Heart Society neitu Gary T Haokip leh a thawk Rosangkimi Ralte, Mizoram Rural Development Society Aizawla chairman K Lalremtluanga, leh Upliftment of Backward Women Self Help Group chairman Thantluangi te chu self help group hrang hrang hminga loan pekchhuah leh chuta tanga sum eirua puh an ni.
Central Bureau of Investigation hnuchhuinaa tarlan danin, Lalkhomang Guite leh a thurualpui Gary T Haokip leh Rosangkimi Ralte hian self help group (SHG) lem pahnih – Nightingale SHG leh Ramdin SHG phuah chawpin, loan cheng nuai 5 ve ve pechhuakin, chu sum chu tichingpen zuia puh an ni.
Lalkhomang Guite leh a thurualpui Gary T Haokip hian SHG 11 – Gilgal SHG, Ropuiliani SHG, Bazar SHG-1, Beiseina SHG, Zanpar SHG, Nazareth SHG, Kumtluang SHG, Hawilopar SHG, Ainawn SHG, Bhakta SHG leh Ideal Mother SHG hmingin loan cheng nuai 5 theuh pe chhuakin, heng SHG-te hian cheng singnga chauh te, a thenin nuai khat chauh te an dawng a, a bak chu tichingpenin, KVIC hnuaia margin money pawh an tih chingpen sak leh bawk nia chhuichhuah a ni.
Lalkhomang Guite leh a thurualpui Gary T Haokip leh Thantluangi te hian ‘Upliftment of Backward Women Self Help Group’ hmingin loan cheng nuai 5 pe chhuakin, heta tang hian nuai khat chauh SHG hian an dawng a, a bak nuai 4 tichingpena chhuichhuah a ni.
Lalkhomang Guite leh a thurualpui Gary T Haokip leh K Lalremtluanga te hian SHG pathum – Greenhill SHG, Zoawi SHG leh Mualmam SHG hmingin loan cheng nuai 5 theuh pe chhuakin, hetiang SHG hian nuai hnih theuh chauh an dawnga chhuichhuah a ni bawk
Court-a thubuai ngaihtuahnaah CBI hian thuhretu mi 50 hmangin thubuai an kalpui a, Court thutluknaah chuan – CBI-in court-ah Thangtluangi leh K Lalremtluanga te thiamlohna hi an finfiah zo lo, tih a ni a. Lalkhomang Guite leh a thurualpui Gary T Haokip erawh puh an nihna ang hian CBI-in finfiah zoin, thiamloh chantir an ni. Chutih laiin, Rosangkimi Ralte hi chu court-a an thubuai ngaihtuah a nih lai, 2018 April 3 khan a thi a, a thubuai hi ngaihtuah zui theih a ni lo.
Lalkhomang Guite leh a thurualpui Gary T Haokip te hi PC Act 1988 hnuaiah thiamloh chantir an ni a, lung ina dah nghal turin court hian a ti a ni.
SHG hnena loan pekchhuah tih chingpenah mi 2 thiam loh chang
