Shimla-ah Asia-a ropeway thui ber tur siam dawn
Himachal Pradesh khawpui, Shima chuan Asia khawmualpuia ropeway sei ber tur neih tumin hma a la mek a, km 13.79-a thui tur hi khualzin hipna atan bakah tlangram hmun panna kawng lun lutuk tihziaawmna tura an tih a ni.
Tara Devi-Shimla Ropeway Project hi tan a ni tawh a, Public-Private Partnership (PPP) hmangin Ropeway & Rapid Transport System Development Corporation chuan a siam mek a, Rs vainelchhe 1,734.40 senna tur a ni a. Asia-a thui ber tur niin khawvela a pahnihna a ni ang.
Ropeway hi Maa Tara Devi leh Sanjauli inkara kal tur niin km 60 vel kar a ni a, a laiah Shimla leh a chhehvelah station 15 a awm dawn a. Darkar tin mi 2,000 vel lehlam lehlam zawngin an chuang tura chhut lawk a ni.
Cabin 660 a nei dawn a, cabin tinin mi pariat atanga 10 a phur thei dawn a. Minute hnih/thum dan vel zelah station hi thleng zat zat thei tura duan a ni ang.
A chuan theihna station (boarding station) hi Maa Tara Devi, Court Complex (Chakkar), Tutikandi Parking Area, ISBT, Tunnel No. 103, Railway Station, Victory Tunnel, Old Bus Stand, Boarding Area Station, Lakkar Bazaar Area, IGMC Hospital, Navbahar, Secretariat leh
Sanjauli te a ni dawn a ni.
Boarding station tinah hian charging station 90 dah a ni dawn a, hei hi khuarel tichhe lo tur chiin nizung chakna hmang chi a ni dawn a ni.
A siamna tur sum 80% hi New Development Bank-in a tum ang a, a bak hi state sorkar tum tur a ni a. Bank hian a siamtu tur zawnna chhuahin thiltih tul ngai ang an tifel tawh.
Zawh a nih hunah chuan zin vel paha khawthlir remchang tur a ni dawn a, lirtheia khawpui chhung tawta tlan aiin mi tam takin an duh zawk rin a ni.
He project hian Shimla-a inkalpawhna hmanrua pawh a titunlai dawn a, khuarel tichhe lo thil hmanga inpawhna tur siamna a ni dawn bawk niin boruak a tithianghlim thei dawn a, khualzin a hip pawh an beisei.
Khawvela ropeway thui ber chu Bolivia-a mi niin km 32 vel a ni.
Shimla-ah Asia-a ropeway thui ber tur siam dawn
