Site icon The Aizawl Post

Sholz-an ralthuam pe lo turin China vau lawk

German Chancellor Olaf Sholz chuan China-in Russia hnena Ukraine indona kal meka tanpui nana ‘ralthuam’ a thawn lut a nih chuan ‘nghawng na tak’ a neih tur thu sawiin mahse Beijing chuan ralthuam a thawn luh a rin loh thu a sawi thung.
Scholz hian tun hnai lawkah Washington-ah US President Joe Biden chu hmuin Ukraine indona chungchang an sawi dun a.
Tun hnaiah US officials te chuan China-in Moscow hnenah indona lama puih nan arms leh ammunition pek a tum tiin an sawi a. Washington a pan hma pawhin Scholz chuan Beijing chu Russia hnena ralthuam pe lo tur leh Ukraine atanga inhnukdawk tura nawr zawk turin a lo ngen tawh a ni.
China-in Russia ralthuam a pe a nih chuan hrek a ni ang em tia zawhna chu Sholz chuan, “Nghawng a nei ngei ang a, tunah erawh ralthuam a pek loh theih nan tihchian kan tum lai mek a ni a, he thilah hian kan hlawhtlin ngei pawh ka beisei a, mahse fimkhur taka engkim kan chhut dip dep a ngai a ni,” tiin a sawi.
Hrek ni ta se engtianga nasa nge tih lama sawi duh lo thung a. Germany hi Europe a economy lian ber niin China in tun hnaia a sumdawnpui lian ber te zinga tel a ni bawk.
“Ram tin ten Russia hnena ralthuam pek loh ni se kan ti a, China sorkar pawhin ralthuam pek tumna a neih loh thu a sawi a. Chu tak chu keini pawhin a tihhlawhtlin kan beisei niin kan thlir mek a ni,” tiin Scholz chuan a sawi bawk.
European Commission President Ursula von der Leyen pawhin tun thlengin China-in Russia hnenah ralthuam a pek an la hriat loh thu a sawi a, “Finfiahna kan la nei lo va, ni tinin kan thlithlai mek reng a ni,” tiin a sawi.
China-in Russia hnenah ralthuam pe se European Union-in a hrek zui ang em tia zawhna pawh, “Thil a nihna chiang phawt se, tihchiana a awm hnuah chhanna siam theih chauh a ni,” tiin von der Leyen chuan a sawi bawk.

Exit mobile version