Thawhlehni zan Allianz Arena inkhelah rin loh takin mikhual Borussia Mon-chengladbach chuan goal khung hmasain, first half minute 35-a Nico Elvedi-a goal hmahruai chu chawlhlawk dawn minute 45-ah Aleksandar Pavlovic chuan Bayern Munich tan a sut a, 1-1-in chawlhlawk an hmang.
Second half laihawl minute 70-a nikum August thlaa sum hmahruai pound maktaduai 86.4-a Tottenham Hotspurs atanga an sengluh hnua goal khung thlah duh lo Harry Kane chuan Munich a thlen hnua a Bundesliga goal 24-na hmangin mualneitu team hmahruailetna goal a thawh a; hun tawp hma minute li la awmah Matthijs de Ligt chuan 3-1-a Bavarians chakna thun ve lehin, German champion hian table-ah pahnihna an thut chhunzawm a, khelh 20 ve veah point hnihin an chung chiaha hmahruaitu Bayer Leverkusen an pha lo zui leh.
Inrinni zan inkhel dangah Barcelona manager thar ni thei tur zinga an rinluh zinga pakhat Xabi Alonso team Leverkusen chuan an hmahruaina humhim thei turin Darmstadt lakah 2-0 hnehna an chang a, he goal hnih hi Nathan Tella tihluh ve ve a ni.
England captain Kane chuan Germany a thlen hnuah record siam der tawhin, match 14-a goal 20 a thun tlin lai khan Bundesliga goal 20 puitlin tura game mamawh tlember nihna record a siam a; tunah pawh record dangin a bawm leh nghal a, German top flight-ah game 20 khelh tlin ruala goal khung hnem ber nihna lo chang tawh pahnih Gerd Muller (1969-70) leh Robert Lewandowski (2020-21)-te hnung zuiin heti zat match-ah goal 24 a tilut tling a, Bayern striker zinga chutiang ti thei pathumna a ni nghal bawk.
A career-a major title la hlawhchhuak ve lo kum 30 mi Kane tan league hma-hruaitu Leverkusen hmakhalha Bundesliga title chang turin a goal khung mar lai a chawlhsan a remchang lo ang!
Tarlan tak angin, English striker hian mimal record ding lai break tur hnaivai a la nei nual a, debut Bundesliga season-a goal 30 tilut tling awmchhun Uwe Seeler (Hamburg in 1963-64) tluk turin goal ruk chiah thun belh a ngai tawh a; Bundesliga kawtkaia English player zinga goal thun hnem ber Tony Woodcock-a goal khung zat (39) tlin ve turin goal 15 a la mamawh bawk a, hei pawh hi season kal laiah a break hman lo a nih pawhin a lehpekah chuan chiang val val tura ngaih a ni phawt!
Woodcock khan kum 1979 leh 1988 inkarah Cologne tan heti zat goal hi a lo ngah tling ve tawh a ni.
Game 50 khela goal 50 puitlin chunga heti zat goal khung tling tura match mamawh tlem ber Erling Haaland-a record ding lai pawh hi Kane tan an huphurhpui lutuk lo, heti renga goal a thun mar zel thei a nih chuan!
Kum 1972-73 chhunga season khata goal 66 khawl tling Gerd Muller-a record em tluk pha tur emaw khum tur emaw chuan Kane hian a tih deuh malh malh erawh a ngai thung dawn niin a lang!
Red card chhiatpui lo Barca
Alaves khelmuala yellow card vawi-hnih hmuh vangin an substitute player Victor Roque hnawhchhuah ni mah se Barcelona chuan 3-1 hnehna nen point thum thawkchhuakin La Liga table-ah Atletico Madrid lehpelin pathumna an luah chho a, Atleti hian nizan Madrid derby result tarlan hman lohah hma-hruaitu Real Madrid an hneh chuan Catalan team an lehpel leh thei ang.
Barca goal thum hi Robert Lewan-dowski, Ilkay Gundogan leh minute 63-a Gundogan thlaktu Brazilian Roque-te tihluh niin, Pole Lewandowski chuan season kal laiah goal kua a khung tling chiah a ni.
Si phur hmasa chunga chak Bayern
