Mizoram hmundang rualin Zirtawpni khan Siaha-ah ‘Zofate inpumkhatna’ tih thupuia hmangin Chapchar Kut hman a ni a. Lakher Pioneer Mission hnuaia Kross Sipai dam awmchhun, RevDr C Thalai (93) chu Kut Pa a ni.
Chapchar Kut lawmnaah hian Siaha-a school hrang hrang – Hill Gate English School, Don bosco School, Beaulah English School, Joel Public English School, Ryusa English School leh Adventist English School zirlaiten Pawnto an entir a. Mizoram Upa Pawl, Mara Hmeichhe Pawl – Mara Chanô Py (MCHP), Lai Women Association (LWA) leh Mizo Hmeichhe Insuihkhawm Pawl (MHIP) ten hnam incheina an entir a ni.
YMA, Mizoram Gorkha Youth Association, MCHP, MHIP leh LWA ten hnam lam entirin, Kut chhima kal mipuite tan Chheihlam hun hman niin group leh mal zai bakah live music ngaihthlak a ni bawk. Kut chhimten Kut puala in duhsakna entirna’n Chawnghnawh hun hman zui a ni.
Chapchar Kut Miss leh Mister thlan a ni a; hnam incheinaa inthuam nalhte thlan an ni. Chapchar Kut kaihnawih thil ziak hnem ber leh ziak tha ber bakah hnam ziarang, incheina, hla leh lam chawinun leh tihhmasawnna tura mipui hnena zirtirna pe tha ber – Best Newspaper thlan a ni a. Lawmman hi Maraland Daily Newspaper-in a dawng a ni.
Siaha-ah Chapchar Kut hmang
![](https://theaizawlpost.org/wp-content/uploads/2023/03/saiha-1024x682.jpg)