Siaha district-ah HIV kai
hmuh thar 7.04% ni pha
Kum kalta chhung khan Siaha district-ah HIV kai hmuhchhuah thar chu thisen endik zat atanga chhutin a sang hle a, raipuar tel loin mi nawlpuiah za zelah 7.04 a kai.
Thawhlehni khan District AIDS Prevention and Control Committee (DAPCC) Siaha chu an chairman, bawrhsap VL Hruaizela Khiangte kaihhruaiin an thukhawm a. Kum 2024- 2025 chhunga DAPCC hnathawh an sawiho
Thutkhawma tarlan danin, sawrkar kum 2024- 2025 khan Siaha district-ah HIV an kai leh kai loh endik mi 2203 zingah 155 chuan HIV an kai tih hmuhchhuah a ni a, hei hi zazelah 7.04 a ni. Raipuar hmeichhia 952 endik zingah 7 HIV hrik hmuhchhuah niin, za zelah 0.74 a ni.
Siaha district-ah hian HIV hrik inkaichhawn tamna ber chu hriau (syringe) inhman tawm atangin niin, za zelah 71.6 a ni. Inpawlna atanga kai 41 (26.45%) an ni thung.
MSACS project director Dr Jane R Ralte chuan, middle school atanga inzirtir tan a tul tawh hial tih sawiin, “Kohhran leh tlawmngai pawlte nen thukhat vuaa hma lak a tul takzet a, ruihhlo ngaiten hriau thianghlim chauh an hman theihnana hriau thianghlim hman tur chhawp chhuahsak (syringe exchange programme) pawh uar leh zau zawka kalpui a tul a; tlawmngai pawl hrang hrangte thlawpna leh thawhpuina kan mamawh a ni,” a ti.
Siaha district-ah HIV kai hmuh thar 7.04% ni pha
