Siaha mite tualthihnaah
police-in man la nei lo
Siaha-a cheng mi pahnih leh an lirthei khalhtu mi pakhat thihna chungchangah police-ten pawikhawihtute an chhui zui zel a, rinhlelh man emaw an la nei lo.
Thudawn danin, March 22 tlaia Mizoram leh Myanmar inrina bul, Myanmar lama an ruang chhar C Biaksuii @ Suiteii Chinzah (48) leh a kalpui Bablu Talukdar (37), New Siaha mi ve ve leh an lirthei hire khalhtu B Lalthafamkima (22), South Lungpher, Lawngtlai district amite thih dan leh a chhan chu chhui zel a ni a. A tirah chuan Myanmar hel pawl pakhatin Mizoram atanga AK rifle lei tura an tih hnu ah Suitei hian an duh ang zat a lei lo bakah an sum pek hi a lo ti riral then vangin, an chunga thinrimin chhuanlam siama thlem chhuakin an tihlum ta ni awmin thu a thang a. A hnua thu dang hriat leh danin, hel pawl mi nia inchhal, Myanmar sawrkar sipai tana thawktuten an bumchhuak emaw ralthuam hmanga sumdawngte kut tuar emaw a nih theih thu sawi a ni leh thung a. Thuchiang chhui mek zel a ni.
C. Biaksuii leh Bablu Talukdar te hi an mi hriat tha tak pakhatin March 19 zing khan an in atanga hruaichhuakin B. Lalthafamkima motor-in Mizoram ramri bul, Ainak panin an chhuak a. Hemi ni zing dar 7.30 velah Ainak thlengin heta tang hian Myanmar ramri lam an pan a. An chin hriat zui a ni ta lo. An chhungten zawngin March 22 zan khan an ruang hi Myanmar ram chhungah an hmu a. Thah an nih hnu ah an ruang hi hal zui nia rin a ni.
Siaha mite tualthihnaah police-in man la nei lo
![](https://theaizawlpost.org/wp-content/uploads/tap_logo-min-large.jpg)