Sialkal Range area zauh dawn

Sialkal Range area zauh dawn
Sialkal Range huamchin chu zauh a ni dawn a, khawchhak tlangdung Burma lam ramri hnaih awmna khua tih hmasawn tumin sawrkarin ngaihtuahna a seng mek tih minister F Rodingliana chuan a sawi.
Sialkal Range Development Council (SRDC) hi an chairman, Lengteng bialtu MLA F Rodingliana kaihhruai hian Thawhlehni khan an thukhawm a. Kum 2026-27 chhunga Sialkal Range hnuaia khaw paruk – Mimbung, Hrianghmun, Kawlbem, Teikhang, Selam leh Vaikhawtlang khuaa hmaasawnna hnathawh tur hrang hrang leh SRDC area tih hmasawnna tur sawiho a ni.
Chairman chuan Sialkal Range Development Council-in a huam chin tih zauh tum a ni tih a sawi a. Tuna khaw paruk bakah hian a chhehvel khua engemawzat SRDC hnuaia rin luh tum a ni, tiin, Mizoram sawrkarin khawchhak tlangdung Burma ramri hnaiha awm khua ho tih hmasawn a duh a, chumi tur chuan SRDC area zauh bakah dan mumal tak hnuaia an inrelbawl theihna turin SRDC manual leh inkaihhruaina dan ennawn mek a ni a, heng hi tih puitlin a nih hunah chuan SRDC huam chin khuaten nasa takin hma an sawn ngei a beisei tih a sawi a ni.
Sawrkar kumthar lamah chuan SRDC budget pawh tihpun a nih a beisei thu a sawi bawk.
SRDC Council thutkhawmah hian member dang – Champhai North bialtu MLA H Ginzalala SDO (Civil) Ngopa, SRDC development officer leh Mimbung, Hrianghmun, Kawlbem, Teikhang, Selam leh Vaikhawtlang VCP theuh an tel a ni.