Daily Newspaper

Siami hoa semi lut India

7

Thawhtanniah sikhat faia team tha Australia barakhaihin Lalremsiami telna India team chuan Olympic chanchina a vawikhatna atan women’s hockey semi-final an lut a; Nilaini hian final luh inchuh match pakhat zawkah World No 5 Argentina an hmachhawn dawn a; India women’s hockey team captain Rani Rampal chuan a team a chhuang takzet tih a sawi.

Rani chuan, “Tun dinhmunah chuan kan thlen chin hian min hneh lutuk a, sawi ber tur pawh ka hre lo. Australia hneh tura inkhel hmachhawn hi a awlai hauh lo a, kan chak avang hian kan zavaiin kan hlim em em vek a, ka team hi ka chhuang takzet a ni.

“Kan inkhelh chhung khan player tinin an thawkrim hle vek a, kan inhrilhtawn vek tawngkam pakhat chu keimahnia rinna nghah leh tha takin kan khel thei tih hi a ni.

“History siamin last four kan lut ve ta hial a, tunah chuan semi-final lamah chauh kan insawrbing rih ang, a chhan pawh kan thlen chin hi kan tawpna ni turin kan la duhtawk lo. He tournament kal laiah hian hnehtu medal hlawhchhuak turin game hnih khelh tur a la awm,” a ti.

Rani hian vawithum ngawt Olympic champion ni tawh Australia nulate an hneh thei chu India hmeichhe hockey ten hnehna lian a nih thu sawiin, Thawhtanni result kha India hmeichhe naupang chhuanthar lo chhuak zel turte tan pawh phurna siamsaktu a nih ngei tur thu a tarlang tel.

Oi Hockey stadium-a World No 9 India chakna goal awmchhun hi minute 22-a penalty corner an hlawhchhuah atanga drag-flicker Gurjit Kaur tihluh niin, kha kha hun puma India nulate’n lone penalty an hmuh awmchhun a ni zui ta nghe nghe.

1980 Moscow Games kha Olympic-a India hmeichhe team chetthat ber tum la niin, team paruk inlan zingah palina an ni a, medal an hawn pha lo chiah chiah.

Khami kum kha Games-a women’s hockey an telh tanna niin, round-robin format hmangin team paruk an inkhelkual a, point hmu sang pahnihin final an khel.

Pathianni khan Olympic mipa hockey bika champion ngun ber India chuan kum 49 hnua a vawikhatna atan semi-final an lo lut ve tawh bawk a, niminah India hmeichhe team-in World No. 2 Australia hnehin last four an lut ve leh a, tun hi Olympic hockey chanchina India mipa leh hmeichhe team-in semi-final an luhdun vawikhatna a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy