Tleirawl te a nih laiin Zoram mipuiin an hmelhriat tawh a, tunah chuan nula tak tak, Nl Siampuii Ralte a ni ve tawh. Mi hriat a hlawh tirh atangin theihtawpin a invawng a, invawn zel pawh a tum.
Siampuii hian mi biangbiak vel thlenga a fimkhur thu a sawi a, mi pawisawi a hlauh thu te, mi ngaihnawm tih loh tur lo sawi palh te a hlauh thu, hemi kawngah a thiam ang anga a invawn thu a sawi.
Mi hrang hrang an bia a, zai turin hmun hrang hrangah an sawm a, programme a neihna hmunah mi hrang hrang nen an inbe thin. Chutiangah chuan tawngkam mawi lo a lo hmang palh ang tih te a hlau a, “|awngkam hi, heti lamah hian ka thiam ang tawkin ka fimkhur ve a, tawng sual palh te a awm thei a, mi pawi ka lo sawi palh ang tih te a hlauhawm a. |awngkam mawi hman hram hram ka tum thin,” a ti.
“Harsatna tawh lai te pawh a awm thei a, rilru hah lai te pawh a awm thei. Mahse hlim hmel put hram hram ka tum a, ka hlim lohna ka tilang ang tih te pawh ka hlau thin,” a ti bawk.
Ngeiawm deuha betu leh lo chhaihtute pawh an awm ve thin tih a sawi a, msg lamah mawi lo taka biate pawh an awm thin tih a sawi. Chutiangah te chuan a fimkhur tih a sawi.
“Tun thleng hi chuan ka la invawng theiin ka hria a, mawi lo taka chhan mai te, thinrima chhan ve mai te pawh a awm thei a, chutiang kawngah pawh chuan ka insum theiin ka hria,” a ti.
Hmaichhana chhaih te, biak nawmnah te pawh an tawh chang a awm a, “Chhang lovin ka kal daih zel,” a ti a, “Theihtawpin hetiangah hian ka fimkhur vein ka hria,” a ti bawk.
Zuk leh hmuama fihlim Siampuii hian zuk leh hmuam leh ruihtheihthil lamah pawh a fimkhur thu a sawi a, “Mi hian zuk leh hmuam leh ruihtheihthilah ka fihlim tih hi hria se ka duh. Hetiang thil ti-ah min ngai ang tih ka hlau,” a ti.
A zaina hmun thenkhatah chuan in tur a awm thu te pawh an hrilh thin tih a sawi a, “Kan hla sakin a zir lo nge ka hre lo a, hmun thenkhatah chuan ‘In tur a awm a nia,’ tia duhsak taka min lo hrilh te pawh an awm thin. ‘Aih! Ka in ngai lo,’ tia lo chhan hi nuam ka ti lutuk. Zuk leh hmuam leh zu leh ruihtheihthil ka tih ngai loh thu sawi hi nuam ka ti a, ka ti ngai lo tih hi lo hria se nuam ka ti lehzual ang,” a ti.
Zaithiam lar Siampuii Ralte hian mi tin tan nun uluk a tul tih a sawi a, “Zai lam kal kan ni emaw ni lo emaw, invawng uluk ila, fimkhur takin nung ila, chu chu mi tinin kan mamawh ka ti,” tiin a ngaihdan a sawi.
Siampuii a theih ang tawkin invawng
