Prime Minister Narendra Modi-an backward classes leh Dalits te tana dah quota chu Muslim te hnenah an pe tia a sawi chu Karnataka Chief Minister Siddaramaiah chuan na taka chhang letin Prime Minister chu a thusawi finfiah tur leh ram pum huapa ngaihdam dil turin a tur.
Thawhlehnia Rajasthan a rally a neihnaah Prime Minister chuan Congress te chuan sakhuana behchhana reservation tihzauha chu chu Muslim te hnena pek an tum a ti a ni.
“Kum 2004 a Centre a Congress-in sorkarna an chan chiah khan an tih hmasak ber pakhat chu Andra Pradesh a SC/ST reservation tihtlema Muslim te hnena pek a ni a. Chu chu an pilot project ram puma kalpui an tum a ni” tiin a sawi.
“Kum 2004 leh 2010 chhung khan Congress te chuan Andra Pradesh ah Muslim reservation tum li kalpui an tum a, mahse, dan lama harsatna leh Supreme Court-in awareness a neih avangin an tihlawhtling thei lo” tiin Modi chuan a sawi a. “Kum 2011 khan Congress te chuan ram pumah kalpui an tum leh a. SC, ST leh OBC te tana rights dah chu laksaka vote bank politics atan midangte hnena pek an tum a ni” tiin Narendra Modi chuan a sawi.
Prime Minister chuan Karnataka a BJP sorkar khan Congress sorkar tena Scheduled Castes leh Tribes te quota chhuhsaka Muslim quota an siam chu a titawp a ni a ti bawk.
Hei hi chhang letin Siddaramaiah chuan Prime Minister thusawi chu ‘dawt muhlum’ tiin a sawi a. “Hriatloh lutuk vang mai bakah hneha awm hlauh lutukna atanga chhuak a ni. Kan ram history ah Modi ang em ema Prime Minister office tihhniam an la awm lo” tiin a sawi.
“A dinhmun avanga a mawhphurhna hria in Prime Minister Narendra Modi hian hetianga dawt muhluma inpuhna hi finfiahna a nei lo a nih chuan ram pum huapin ngaihdam dil rawh se. Khawiah nge Congress ten SC/ST leh backward classes te reservation a chhuhsaka Muslim te hnena a pek? State Congress sorkar chutiang policy kalpui chu eng state nge? Official government document a awm em? Prime Minister Modi hian heng te hi kimchangin ram mipui te hriatah puangzar rawh se” tiin Siddaramaiah chuan a sawi.
Constitutional reservation chu duh anga amend ngawt theih a ni lo ti bawkin, “Social and economic survey report behchhan chauhin revision atanga reservation siam theih chauh a ni. State sorkar ten Scheduled Castes leh Tribes reservation an siam danglam thei lo hrim hrim. Prime Minister in basic knowledge te em pawh a nei lo hi chu ram tan a vanduaithlak a ni” tiin Siddaramaiah chuan a sawi bawk a.
Siddaramaiah chuan Muslim te chu Karnataka ah 2B category for backward classes ah dah an ni a ti a. “Tuna kan tih a ni lo. Kum 1974 a L.G. Havanur Backward Classes Commissions report behchhana tih daih tawh a ni. Reservation kum sawm thum chuang kalpui a ni tawh a. He state a BJP sorkar tawh emaaw Narendra Modi kaihhruai Union government tun hnai kum sawm chhung sorkar tawh emaw chuan he reservation-ah hian zawhna an nei ngai lo. Chu mai a ni lo, tumah BJP hruaitu pawh tiamin he reservation hi court a khing an la awm lo” tiin Siddaramaiah chuan a sawi bawk.
Siddaramaiah-an Modi chhang hrep
