MBOCWWB 8th Inter Village / Local Council Football Tournament 2026 chu April 21, Thawhlehni khan Durtlang Football Stadium leh RG Stadium-ah khelh chhunzawm leh a ni a, Sihphir Venghlun chuan awlsam takin Phulpui VC an hneh. Inkhel dangah Darlawng in Bawngkawn LC an hneh ve thung.
Sihphir Venghlun hian RG Stadium-a an khingpui Phulpui VC an ngam viau a, 7-0 ngawtin an sawp. Sihphir Venghlun tan hian Pc Lalruatsanga leh Benedict Lalhmingsanga ten goal hnih ve ve an thun a. Malsawmtluanga Pautu, Lalhmunmawia leh Joseph Lalthafela ten goal khat theuh an thun bawk. He inkhelah hian Sihphir Venghlun tan goal hmahruai thuntu PC Lalruatsanga chu ‘Player of the match’ ah thlan a ni.
RG Stadium a inkhel dangah Darlawng in an khingpui Bawngkawn LC chu 4-2 a hnehin an hnawkchhuak ve bawk.
Darlawng tan tan hian Lalchhuansanga chuan minute 20-naah hmahruaina goal a thun. Aizawl Veng lian lakah goal an thun vangin phur viau mah se an phur rei lova, Bawngkawnin goal an chhuah atanga minute thum hnu lekah Vanlalmuanpuia goal thun hmangin an si phurh an sut leh nghal. Inhnaihchilh taka goal a luh zawn hnuin Darlawng an chefuh hmasa leh a, chawlhlawk dawn hnaih minute 44-naah Stephen Zorinsanga chuan hma an hruai nawn lehna goal a thun a, 2-1 a hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, goal a luh belh leh thuai. Minute 52-naah Bawngkawn in an si phurh an sut. 2-2 a nih hnuin an inhnehtawk zui viau a, tie-break hmanga thelh an ngai tura ngaih a ni hman. Hun pek belh tlem awmah Darlawng an chepui ta viau thung a, goal hnih ngawt an thun. Darlawng tan hian Lalhmangaihzuala chuan minute 90+3-naah hma an hruai nawn lehna goal a thun. Goal an chhuah hnuin Bawngkawnin an si phurh sut ngei tumin tan an khawh a, goal thun an tum luatah an chesual tlat thung. Darlawng tan hian Lalhmangaihzuala chuan minute 90+7-naah an goal lina a thun zui leh ta mai a, an chakna nemnghetin, Bawngkawn lakah 4-2 in hnehna an chang zui ta a ni.
Bawngkawn laka khel tha tak Lalchhuansanga chu ‘Player of the matcht ah thlan a ni.
Thawhlehnia inkhel dangah Kelsih VC in an khingpui Durtlang North LC chu 3-1 in an hneh a. North Lungleng VC team in an khingpui Edenthar chu 5-0 ngawtin an sawp ve bawk.
Inelna neih mek hi vawiin hian Durtlang Football Stadium-ah RG Stadium-ah khelh chhunzawm leh a ni ang a. Inkhel paruk a awm ang. Durtlang Football Stadium-ah Chaltlang LC leh VC LC an inkhel hmasa ber ang a. Armed Veng South LC leh Republic LC bakah Venghlui leh Zotlang an inkhel bawk ang. RG Stadium lamah; Chhinga Veng vs Chamring, College Veng vs Muthi baka Tlangnuam vs Maubawk te an inkhel dawn bawk. Inkhel hi zing dar 9:30, chawhma 10:45 leh chawhnu dar 2:00 ah te khelh tan tura ruahman a ni a, inkhel hmuhnawm beisei a ni.
Sihphir Venghlun an chak awlsam
