Rangvamual-a Gov’t. Nepali Primary School zirlaite sikul kawt tualzawla zirna an kalpui chungchanga MZP-in sawrkar a dawrnaah an beisei ang chhanna an hmuh mai loh avangin vawiin atanga hnatlang neih an tum chu, nimin Pathianni khan thuneitu lamin sikul building sak that a nih tur thu an sawi tak avangin MZP chuan hnatlang neih tur chu an thulh tih thuchhuah nimin Pathianni zan khan an siam ve leh nghal a.
He sikul hian tunhma chuan heti tak hian classroom indaih lo khawp zirlai an nei ngai hran lova. Covid-19 hripui a lo kian hnu deuh khan English Medium-a dah a nih tak avangin zirlaiten an bawh ve ta deuh nia sawi a ni a. Nikum kum laihawl vel atang khan sikul kawtzawla class lak hi a ngai tan a, school hotute pawhin sawrkara thuneitu lam pawh an lo dawr tawh thinin, MZP lam pawhin hma an lo lakpui thin tawh a, mahse hmasawnna hmel hmuh tur a awm ngai lo a. Tun hnaiah MZP lamin tan an han la thar leh a, hnatlang neih an rel hnuah sawrkar thuneitute chuan sikul building thiaha a aia lian zawka sak that law law an tum tih an sawi tak avangin hnatlang pawh thulh chawpchilh nghal a ni a. Sikul building tur sak that chhung hi chu sikul atan Rangvamual Community Hall hman tur a ni ta a ni.
Zirna enkawl leh thlai tiak tir enkawl hian inanna an nei. Thlai tiak tir hi, leitha leh tuia chawm that chu tha takin a thang lian a, rah tha tak, eitlak a chhuah thin. Mahse, thlai tiak chawm that loh chu a thang tha thei lova, rah tha a chhuah thei lo thin a. A hnuah tui pein leitha nen vur chiam mah ila, a tir atanga enkawl that thlai nen chuan an inthat hleih em em thin.
Hetiang deuh bawk hian zirna pawh hi elementary stage atanga enkawl ngun leh enkawl ngun loh kar chu a hla hle a. IAS nihtir tuma a ler lama thuai nghek nghek hi a sawt mawh viau tawh thin a nih hi.
Zirna kan uar em em rual hian, a pawimawh lai ber Elementary stage hian ngaihthah a hlawh ber em ni chu aw tih turin kan awm thin a. Ram changkang zawkten elementary stage-a zirlaite dinhmun pawimawhzia hriaa mithiam zawkte an enkawl tir ang hi entawn ve thei tawh ila a duhawm hle. Chutih ahneka sikul tuala kan la indah mai mai a nih chuan, inenfiahna tur kan la ngah tih a hriat a, helamah hian tan lak a ngai hle a ni.
Sikul tuala class lak…
