Ailawng khaw mi Lallawmkima chuan an khaw mi tho Lalrokima chu tualchher silai hmangin a kap a, a hliam tuar loin tunhnai khan a thi. Ailawng khawtlang chuan pawikhawihtua puh hi an ensan nghal a ni.
Thudawn danin, kumin August 28 zan dar 9.00 vel khan Lallawmkima (43) chuan an ina leng Lalrokima (61) s/o Thankhama (L) chu a air pistol (maniature .22 mu thun theih) hmangin chaldarah a kap a. Silaimu hi tlang loin a tukhumah a tang a, amah hi nikhaw hre loin a awm zui a ni.
A kaptu bakah midang awm ve ten buaipuiin Reiek damdawi in panpui a ni a, Civil Hospital Aizawl panpui leh niin, ICU-ah dah nghal a ni a, ventilator hmanga thawk tir niin, September 2 chawhma dar 10.25 khan a hliam tuar loin a thi a ni.
Pawikhawihtua puh Lallawmkima hi amaha khawsa, ruihtheih thil laka fihlim lo tak a ni a, Lalrokima nen hian inkawm ve thinin, pawikhawih zan pawh hian midang nen an awm hoa, inhnial buaina pawh awm loin silai hian a kap ta mai nia sawi a ni.
Amah hi a buaipuitu zingah tel mah se, Lalrokima chhungte bulah amaha inkap nia a sawi hnu ah amahin a kap palh ni te in a sawi leh a, a hnu ah police hmaah ama kah niin a sawi leh bawk.
He tualthihnaah hian Lalrokima chhungte hian Kulikawn Police Station-ah thubuai an thehlut a, chumi bawhzui chuan thubuai pathum ziahluh a ni.
September 2 zana Ailawng Village Council leh All NGO’s Joint Committee thuchhuak chuan Lalrokima thihna chungchangah Lallawmkima hi na takin a dem a, dan hmanga a na thei ang ber a hrem a phut tih a sawi.
Lallawmkima chunga Ailawng khawtlang hruaitute thurel:
8 YMA Ailawng Branch-in chhiatni fund leh member fee a pe kir anga, YMA member a nihna a hlihsak ang.
8 A in thiahsak a ni anga, a hun atan September 4 (Nilaini) zing dar 7.00 a ni ang.
8 Ailawng khua atanga hnawhchhuah a ni a, Ailawng ram leilung rap tawh lo tura tih a ni.
8 Ailawng khua leh tui a nihna hlihsak a ni a, Ailawng khua leh tui a nihna anga chanvo leh hamthatna a neih theih zawng zawng pawh hlihsak a ni ang. A lo thi a nih pawhin Ailawng thlanmualah phum loh tur a ni.