Daily Newspaper

‘Silent Night, Holy Night’

7

J. Vanlalnunthara; Camp: ZTN

“Here we were laughing and chatting to men whom only a few hours before we were trying to kill” – John Fergusion

Khua a thiangin vanah arsi an pe un a, sikpui rawng, silai leh zen tih loh chu tuar har em em a awm lo, zaipawl leh rimawi inthum chhawk hriat tur a awm lo va, ngirtling hram takngial pawh. Chu zan boruak vawt leh uap churh karah chuan mahni chengrang chawia zalen hun tur ngaihtuah ngawt pawh thil harsa tak a ni a, ram tan engtikah nge ka fam ang a, doral engzat tak famtir ang maw tih chauh lo chuan rilru a luah lo thei lo a ni. Kan thatlai hun hi a hlu a, kan kianga mite tan ngawi reng pawha kan hlut theihzia hriat phei chuan dam man awm tak a ni. Thlasik thlifimin rilru a chhem fim ngawt lo va, silai leh zenin ram a siamtha bawk hek lo, keini a chengte hi kan pawimawh ber a ni.

Khawvar lam arsi chu thlir ninawm loh tak a ni a, ni chhuakin eng nge a rawn chhuahpui dawn tih erawh thil thlir thiam har tak a ni. Sipai hotu rawn dingchhuakin an unau sang tam nun chante tana hnehna sual chhuak ngei turin a naute a fuih liam liam lai chuan ral lehlam atanga eptu pawl in ‘Silent night’ aw inthum chhawk a, boruak vawh lutuk avanga aw khur tham thama an sak chuan a rilru a hneh hle a ni. Khawvel sual chhandam tura ran in-a lo piang Isua Krista piancham chu tumahin chu trench khur vawt leh rawng takah chuan an theihnghilh lo va, lehkha mawi inpea, duhsakna thilpek leh ruai ropui theha, mahni hmangaih tak te nen, hmangaih tur leh hmangaihtu baihvaia van ruai tan pawha hmangaihtu Isua Krista piancham lo thleng chuan chu hmuna awm te chu a zam hnehin a fan thar leh a, hmangaihtute pawimawhzia an hre chhuak thar ve ngei ang. Hmangaihna vanga rawn kal a ni miau a, an demawm lem loh.

Eptu pawl zai ri chu chhawnin, indo lova awka inchhawnin lai leh lai takah an intawk a, hun kha leh chen lo insaiin lo intihlum tawh mah se chu zan thiang reh ruih karah chuan remna lal fa lo pian chhan remna changchawiin mahni neih chhun, an thul mawnga an dahthat chu phawrhin duhsak takin an inpe tawn a, cigar leh cigarette infawh tawmin hringnun laimu hmangaihna an infah tawn a, zan thianghlim (holy night) zawng a ni ngei e.

Darkar rei lote hnua hmelma inchana, pawisak nei map lova inral sai leh tur an nihna dahthain, savun hampuar siam chawp chu hlimna vawrtawp an thleng ta maw tih mai turin hlim takin an pet a, zen sawh muk ngawt ai chuan a dawn a nuam zawk ngei ang. Hlauhna leh raltit awm hauh loin, hun rei lo te chhung pialral nawmchen an tem ni awm takin an hlim a, German Lieutenant Kurt Zehmisch chuan “Heti ang hun duhawm leh ropui dangdai hi a awm leh tawh lo ang”, a ti hial a ni. Sikpui hunpui khel lova mite nghahfak, inhmangaihna hun duhawm, damchhunga hmelhma inchan tur tan pawha inhmangaihna hun remchang Christmas hi a hluin remna hi a va rem em!

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy